Shillong, K’lyngkot 03 : Ka seng Hynniewtrep National Liberation Council (HNLC) hynne ka sngi Balang, kala pynbna ba kan weng noh ialade na ka miej iakren iasuk bad ka Sorkar Pdeng lem bad Sorkar Jylla.
Ka HNLC lyngba u Chairman-cum-C-in-C Bah Bobby Marwein bad u General Secretary-cum-Publicity Secretary Bah Sainkupar Nongtraw, kala phah da ka shithi sha ka Ministry of Home Affairs (MHA) lyngba u AK Mishra, Advisor (MHA, Northeast) ban pyntip ia kane ka rai.
Kat kum kane ka shithi, ka HNLC kala pynpaw ba ia kane ka rai la shim halor ka nongrim ba khlem lah ban pynurlong ia ki mat jingdawa ka seng.
Ia kane ka shithi la phah copy ruh sha u Myntri Rangbah ka Jylla, Myntri kam Pohiing bad sha ki ksiang ka Sorkar bad Nongmihkhmat ka HNLC sha ka miej iakren iasuk.
U Bah Sainkupar ha ka kyrwoh, u pyntip ba ki jingdawa kiba ka seng ka dawa ka dei kaba la aiti sha ka Sorkar Pdeng da u Bah (L) Cheristerfield Thangkhiew aduh ka 16/01/2021.
“Wat hapdeng ka jingpyrshang jong ngi ban ban jur bad iai ban ia ki jingdawa jong ngi lyngba u nongrahktien, Bah Sadon Blah, ka Sorkar kala pyni ia ka jingbym shimkhia ia ki jingdawa jong ngi. Namar kata, ia ki jingdawa jong ngi ym pat shym la rah iakren, lehse namar na ka jingbym khein snep jong ka Sorkar” ong ka kyrwoh.
Ki jingdawa kiba la HNLC kala buh hakhmat ka long : Kaba nyngkong eh ka dawa ban weng noh ia ka jingkhein beain (Unlawful Association) kat kum ka sub section (1) jong ka section 3 jong ka Unlawful Activities (Prevention) Act, 1967.
Ka HNLC ka dawa ruh ban weng noh ia baroh ki case bala pynngat ia ki Nongialam bad ki Dkhot ha baroh ki Iingkashari ba don ha Jylla haba phaikhmat kyrpang sha ki case ha Khasi Hills bad Jaintia Hills. Ka jingweng noh ia kine ki case kan lam sha ka jingiasngew shngain ha ba wan sha ka jingiakren.
Ka long kaba kongsan ban ai lynti iaid kaba shngain ia ki Nongialam bad ki Dkhot ka HNLC ka ban pynthikna ia ka jingshngain jong ngi bad pynkhlain ia ka jingshaniah bad plie lynti ia ka jingwan iashimbynta jong ki sha ka miej iakren iasuk.
Ka HNLC ka tyrwa ban thung ia u Nongmihkhmat bala aiibor u ban rahktien bad pyntyllun shakhmat ia ka jingiakren.
Ka HNLC ka dawa ruh ban pyllait noh ia baroh ki dkhot ka HNLC bad ki riew shimet kiba shah kem halor ka jingsuba donkti bad ka HNLC, kiba dang don ha along.
Ka kyrwoh ka pyntip ba ia kine ki jingdawa la dep ruh ban pynsngew lyngba u nongmihkhmat Bah Sadon Blah hynrei, la ong ba napdeng kine ki jingdawa, tang ka jingdawa kaba 3 bad ba 4 la pyntreikam da ka Sorkar Jylla napdeng ki 5 tylli ki mat.
U Bah Sainkupar ula ong ruh ba ka HNLC kala iai ban bad aiktien na ka por sha ka por lyngba ki lad pathai khubor bad sha ki ksiang bad ka Sorkar, ba kyntu ba kim dei ban pynmih ia kano kano ka jingkhot hajir kaba lah ban nang aiding. Hynrei, ia kane ka jingkyrpad ym shym la don ba pynsngap bad ka jinglong jingmang kala nang heh nang heh khlem nongrim.
Halor ka jingdawa ka Sorkar India ba baroh ki Nongialam ba hakhlieh ki dei ban wan iashimbynta ha ka jingiakren iasuk, u Bah Sainkupar ula ong b aka General Council bad ka CEC jong ka seng ba long ha ka 16 tarik Nailur 2022, kala aibor ia ka kynhun hapoh ka jingialam jong u Vice Chairman ba un lamkhmat ia ka jingiakren bad ka Sorkar tad haduh ba ki arliang mamla kila iasoi ia ka soskular sangeh iasiat.
U pyntip ba ka Sorkar kala mynjur ban shong ia ka jingialang bad ka kynhun hapoh ka jingialam u Vice Chairman hynrei khlem poi pyrkhat, hapdeng ka jingiakren, la pynbor ia u General Secretary (Sainkupar) ban wan donlang ha ka jingialang.
U kynthoh “ka Sorkar kala pyni ia ka jinglong arsap haba ka National Investigation Agency (NIA) kala khot hajir ia u kum u General Secretary, u Chairman bad Finance Secretary. Nalor kane, hadien ka jingiakren jong ka wat ba nyngkong, ki bor ka Sorkar Jylla kala phah notice ba khot hajur ia nga, kaba long pyrshah ia ka jingkular bala ai da ka Sorkar India bad ka Sorkar Meghalaya ban kiar na ka jingkhot hajir lane kem ia ki Nongialam bad ki Dkhot katba dang iaid ka jingiakren”.
“Wat hapdeng ki jingma bala shim da ki Nongialam bad ki PSO ban wan sha ka jingiakren, lad aka Sorkar ka kyntait ban ailad ia ka jingsuk, kam lah ban tynrong ia ka jingbahkhlieh ha ka HNLC ba ka shim ia ka lynti jong ka jingiaumsnam” ula ong haba bynrap “Khnang ban burom ia ka jingiakren iasuk, ngi la pynsangeh lut ia baroh ki kam bymman, kaba ngi kyrmen ba ki paid ka Bri u Hynniewtrep kila iohi lyngba ki lad pathai khubor. Mynta, wat ym khmih lynti b aka HNLC ban wanphai bad kyrad biang ia ka jingsuk kum u ksew ba kwah shyiengdoh”.
