Nongpoh, Kyllalyngkot 16: Da ka jingthmu ban plie ia ka lad ka lynti na ka bynta ki samla kiba la iehnoh ia ki jingpule shiteng por bad ruh ia ki kynhun Self Help Group ba kin lah ban ieng ha la ki jong ki kjat, ka Aide et Action kala pynlong ia ka jingai jinghikai sengkam lajong ha Ri-Bhoi bad hynne ka sngi nyngkong, kala sam ia ki syrnod sha ki 70 ngut ki longkmie na ki kynhun SHG kiba la pyndep ia ki jinghikai.
Ka kynhun Aide et Action ka dei ka kynhun treimon sngewbha kaba ju pynlong ia ki programme ai jinghikai bapher bapher bad ha kane ka kynti ka la treilang bad ka Bhoirymbong C&RD Block lem bad ka Meghalaya State Rural Livelihood Mission (MSRLS)ban ai jinghikai ia ki longkmie na ki SHG bapher bapher ia kaba la tip kum ka Enterprise Promotion for Sustainable Development lane ka prokram ban hikai kumno ban sengkam lade.
Hadien ka jingkut noh kane ka prokram ai jinghikai, ka kynhun ka la sam ia ki syrnod sha ki 70 ngut ki longkmie ha kaba la sakhi lang ruh da ka kong Banri Khongjee Young Professional na MSRLS, Bah H Shylla Network Development Manager ka Aide et Action, Bah F Dkhar Cluster Co-ordinator, kong Lanosha Sun Field Officer ka Aide et Action bad kiwei kiwei ki riew rangbah.
Na ka liang ki nongialam ka Aide et Action, ki la pynpaw ia ka jingkmen kaba khraw ban lah pyndep ia kane ka prokram kaba jop, ka ban ai jingmyntoi shikatdei ia ki longkmie ban ioh ia ki buit ne jingshemphang kumno ba kin lah ban sengkam lade bad ban ieng ha la ki jong ki kjat khamtam ban ioh pat ia ka lad ban pynbiang ia ki jingdonkam ha la iing la sem bad ruh na ka bynta ki kynhun Self Help Group kaba ki don.
