Nongstoin, K’lyngkot 16 : U MLA barim ka HSPDP na Nongstoin Bah Diostarness Jyndiang, ula iehnohkam kum u Nongkitkam ka seng HSPDP bad pynkhreh ialade ban rung sha ka BJP bad ban long kyrtong jong kane ka seng rong pukir (saffron) ha kane ka elekshon MLA ban wan.
Une u MLA barim ula aiti ia ka shithi iehnohkam sha u President ka HSPDP Bah KP Pangniang naduh ka 6 tarik mynta u bnai. La pyntip ba une u MLA barim un rung noh sha ka BJP ha ka 18 tarik bad yn pdiang burom ia u da ki Nongialam ka BJP-Meghalaya ha ka jingialang ka ban long ha Bishop Hall.
Haba ïakren bad u Bah Dios, u la ong ba ka daw jong ka jingmih noh na ka HSPDP ka dei ka daw shimet jong u. Hynrei, mynta pat u la pynkhreh ïalade ban ïakhun noh na ka BJP bad ha kaba ïa dei bad kane ka rai lehse yn sa ïa kren bha ha katei ka sngi ryngkat ki heh BJP.
U la ong ruh ba u don ka jingkyrmen ba un jop na Nongstoiñ Consituency, da kaba pyndonkam ïa ki buit treikam kiba u don. Nalor nangta u pynpaw ruh ka jingkyrmen ba ka BJP ha kane ka elekshon ban wan, la kumno kumno kan jop beit 12 lane 13 seat.
