Nongstoiñ, Nohprah 23: Kum shi bynta ban pynpaw ïa ka jingsngewnguh, ki 7 tylli ki shnong kiba kynthup ïa ka shnong Nongsleh, Mawkhar, Mawsaw, Tynrongmawsaw, Kyndangkdait, Pyrden bad ka Mawkdep, ha ka sngi palei ki la pynkup burom ïa u bah Gigur Myrthong MLA/MDC ka Mawshynrut constituency.
Katei ka jingpynkup burom ka dei namar ba utei u MLA bad MDC katei ka thaiñ, u la lah ban pynïoh surok sha kitei ki shnong. Katei ka surok ka dei kaba 12 kilometer ba pyniasoh na Thaiem shaduh Mawsyrpat.
Ka Joint Action Committee jong ki 7 tylli ki shnong ka thaiñ Mawkhar, ki la pynlong da ka jingpynkup burom ïa utei u nongmihkhmat, ha kaba katei ka kynhun ki Rangbah Shnong, ki la pynphong da ka sut ïa utei u nongmihkhmat, kumjuh ruh ban ai sngewbha ïa ka kurim jong u kum ka dak ka jong ka jingpynkup burom.
Ïa kane ka jingïalang la pynlong ha madan shnong Mawkhar, Mawshynrut West Khasi Hills District, ha kaba la ïadon ryngkat lang ruh ki Sordar shnong jong ki 7 shnong, ki riew rangbah jong ka thaiñ bad ruh ki khun samla kiba la ïashimbynta shitrhem da ki jingpynbyrnïa bapher bapher kynthup ïa ki jingrwai bad ki jingshad.
U bah P.Wanniang Sordar ka shnong Nongsleh kum u nongaiktien jong katei ka synjuk, u la ong “Ngim lah ban klet ïa kane ka sngi ka ban long ruh kum ka histori ha ka thaiñ, namar kum kane kam pat ju don. Haba nga kynmaw ïa ki por barim, katno ngi shem jynjar haba ngim ju don ka surok khamtam eh ha ki aiom lyiur ka long kaba sohsat haduh katta katta.
Ngi ju kit ïa ki nongpang ha ki khoh kiba ngi la shna khnang na ka bynta kiba pang ba shitom. Hynrei mynta ngi la sdang ban ïoh shong wat da ki kali maruti, kumta katno nga sngew kyndeh ka mynsiem”.
“Kane ka long ka jingpynkmen shisha ïa ka thaiñ jong ngi, namar nga kynmaw myn ba nga dang khynnah, haba ki tymmen jong ngi ki phah kit jingkit ïa nga, nga lah ïam namar ka jingkhia palat ka jingkit. Hynrei yn leh kumno namar ka thong ka long ban pynpoi beit ïa ka jingkit, kumta ngi ka kynhun ki nongsynshar ngim lah ban khlem da pynpaw ïa ka jingsngewnguh ïa uno uno u ba la leh bha na ka bynta jong ngi”.
