Shillong Jylliew 25: Kum shi bynta ban ithuh bad ban ai mynsiem ia ki khynnah pule kiba stad, hynne ka 25 tarik u Jylliew, ka University of Science and Technology Meghalaya ryngkat bad ka ERD Foundation Guwahati kala pynkup burom iaki samla pule jong ka jylla Assam bad Meghalaya kiba la wan shakhmat ha ki jingpule.
Kitei ki kynhun kila pynkup burom ia ki 138 ngut ki samla pule kiba la ioh iaki Position bapher bapher haka eksamin Klas X bad XII, kaba kynthup ia kiba wan shakhmat eh haka HSLC bad AHM kaba hap hapoh ka jingpyniaid jong ka SEBA, Assam bad kiba wan shakhmat eh haka SSLC bad HSSLC kaba la pyniaid daka MBOSE jong ka jylla Meghalaya.
Ki samla pule kila ioh pdiang ia ki syrnod, pisa bad ki momento haka jingialang kaba la wan ban iadonlang da ki heh ki haiñ bad ki riewpawkhmat, ki Principal na ki ar tylli ki jylla bad ia katei ka prokram la kyrshan da ka Vision 50 Academy bad ka Competitive Examination Coaching Centre jongka ERDF.
U Dr RM Pant, Vice Chancellor jongka Assam University, Silchar u la ai jingkren kum u kongsan ha katei ka jingialang.
Katba u Mahbubul Hoque, Chancellor jongka USTM, u la ong, lada lah ban don ia ka thong ryngkat bad ka jingtrei shitom kin lah ban pynurlong ia la ka jingangnud bad kan ym don kano kano ha kane ka pyrthei kaba lah ban khanglad ia ki.
U la ong, ka jingnang jingstad kadei ka atiar ban kyntiew bad ban rah sha jrong ia ka thaiñ, kumta ki samla ka ri ki dei ban pyrkhat bad ban leh ia ki kam naka bynta ka bha ka miat jong ka imlang sahlang haba ki dang ialeh ban tei ia ka lawei ka jongki.
