Nongpoh, Naiwieng 18: Ka United Democratic Party (UDP)-Umsning Circle, hynne ka sngi thohdieng, kala pynkup burom ia ka khlur iakhun kti ka Jylla Kong Margaret Pathaw bad u President Rangbah kane ka Seng Riewlum Bah Metbah Lyngdoh ula ai sngewbha da ka song pisa ba T. 1 lak sha kane ka khlur ialehkai.
Ka Kong Margaret Pathaw ka dei ka khlur iakhun kti kaba la mihkhmat ia ka Ri India sha ka lympung World Arm Wrestling Championship ba dang shen ha Ri Turkey bad kala wanrah ia ka burom ia ka Jylla da ka jingioh rah ia ka takma ksiar na kane ka lympung.
Haba kren ha ka jingialang, u Bah Metbah Lyngdoh ula pynpaw ia ka jingsngewkmen ban iohi ba ka Kong Margaret kan wanrah ia ka nam na ka bynta ka Jylla.
Une u Nongialam ka UDP uba dei ruh u Lamphang ka Iingdorbar Thaw Ain ka Jylla ula kyntu ia ki nongialehkai ka Jylla la ki don ha kano kano ka jingialehkai ba kim dei ban duh mynsiem bad kim dei ban sheptieng. U la ong ruh, ka jingiashim bynta ha kano kano ka jingialehkai ka pyni ba phi long shlur bad lyngba ka jingsdang shi sien ka sngi phin sa ioh ia ka jingjop.
I Kong Margaret ila pynpaw ia ka jingsngewnguh ia ki Nongialam ka UDP-Umsning bad ai khublei ruh ia u Bah Metbah ba ula don bynta ban kyrshan bad ai mynsiem naduh ki sngi shuwa ban mih leit iashimbynta ha kane ka lympung ha Turkey.
