Shillong, Risaw 20 : Ka Tnad Wild Life lyngba ka Ophis u Divisional Forest Officer, Jaintia Hills Wildlife Division, hynne ka sngi, kala pynkup burom ia 16 ngut ki nongshongshnong ka ri-lum Jaintia da ka khusnam ‘Wildlife Samaritan Award” namar ka jingiarap bad ai jingiada ia ki mrad khlaw na ki jingma.
Kane ka jingpynkup burom ia kine ki Nongshongshnong ha ka jingpyndap pyrda ia ka jingrakhe ba shi taiew kynthih halor ka phang “Partnership for Widlife Conservation” kaba la pynlong ha ka shnong Demthring.
Ia ka khusnam u snem 2022-2023 la ai sha u Bah Daioo Wan ba na Moodymmai Wah bad Kelsi Lapasan na Chutwakhu kiba la iarap bad iada ia ki dkhoh ba ju tip kum ki Barn Owl.
Khatsaw ngut pat ki nongshongshnong kila ioh ia ka khusnam jong u snem 2023-2024.
Kine ki kynthup ia u Monlang Talang, Hynruki Dkhar, Sambha Dhar, Achuhmi Lamare, Marbanki Law, Emmichirup Jones Pyrtuh, Shanlangki Sungoh, Fairy June Sungoh, T.Padit, Liiomio Laloo, Saphiius Suting, Kopsarlin Rymbai, Arban Sungoh bad Damemaia Sakhiat Laloo.
Kine ki briew kila iarap bad ai jingiada ia ki mrad bapher bapher kum ki sim bad kine ki mrad ki kynthup ia u khla thap sim, slow loris, palm civet, Asian barred owl, keeld box turtle (dkhar), minotor lizard, india giant flying squirrel, tokay gecko, white breasted kingfisher, black kite india bad ferret badger.
Ka Tnad kala pynkup burom ruh ia ki Rangbah Shnong jong ki hynriew tylli ki Shnong.
Ia kane ka jingialang la pynshongkun da ka jingiadonlang u Principal Chief Conservator of forest (Biodiversity & Wildlife) bad Chief Wildlife Warden S.M Sahai bad Chief Conservator of Forest (Wildlife) P.K Agrahari.
Ha kane ka sngi la sam ruh ia ki khusnam bad certificate sha ki samla pule kiba jop ha ka jingiakop dro bad iatyrko.
