Shillong, K’lyngkot 29 : Ka Dorbar Shnong Raid Sawkur Nongkseh ha ka sngi Balang, kala pynkup burom ia ka kynhun ialehkai bad nongkitkam jong ka Nongkseh Sports Social and Cultural Club, kaba la wanrah sha iing ia ka nam lahduh jong ka All India Chief Minister International Gold Cup 2026 kaba dang shu kut dang shen ha Jorethang, Sikkim.
U Myntri ki kam ialehkai ka Jylla Bah Wailadmiki Shylla, ula iadonlang ha kane ka jingpynkup burom kum u kongsan bala khot sngewbha da ka Dorbar Shnong ha ka jingiadonlang u MLA ka Mylliem Bah Ronnie V Lyngdoh, u President ka Meghalaya Football Association Bah Hamletson Dohling, u President ka Shillong Sports Association Bah Banteidor Lyngdoh, u Rangbah Shnong ka Nongkseh Bah Mairang Thangkhoew bad kiwei kiwei.
Lah ban kdew hangne, ka Nongkseh SSCC kala thaw record ha ka histori jong ka jingialehkai phutbol ka Jylla da kaba long ka kynhun lehse kaba nyngkong eh, ba kan jop lynter haduh lai tylli ki trophy ne ki nam lahduh khlem ka jingshah rem wat tang shisien ruh ha ka jingialehkai.
Ka jingjop ba nyngkong ia ka nam lahduh kala wan ha ka samoi ialehkai 2025 ha ka lympung ialehkai 1st Division jong ka Shillong Sports Association bad nangne, kala bteng ia kane ka lynti iaid ban ioh rah ia ka nam lahduh sa ha ka jingialehkai jong ka Shillong Sports Association Champions Cup bad mynta sa ka All India Chief Ministers International Gold Cup 2026 ba long ha Sikkim.
U President ka Nongkseh SSCC Bah Daniel Thangkhiew ula ai jingiaroh ia ka kynhun ialehkai bad khamtam eh ia u Coach ka kynhun Bah Richardson Nongneng uba la btin lynti ia ka kynhun ban ioh rah haduh lai tylli ki trophy.
Ula ong ba ka jingwan iasoh ki rang ialehkai kiba ju ialehkai na ki club kiba heh sha ka Nongkseh ha ka 1st Division, kala ai mynsiem ia ka club bad kine ki rang ialehkai kila wan ym namar ka pisa hynrei namar ka jingieid ia ka phutbolbad ban kyntiew ia ka Nongkseh.
U Bah Daniel ula pynbna ba ka Nongkseh SSCC kan sa iasoi contract sa bad lai ngut ki rang ialehkai Khasi bad kan sa pyllait paidbah ruh shen ia ki jersey thymmai jongka club.
U Bah Hamletson ula iaroh ia ka Nongkseh hapoh ka jingialam u Bah Daniel Thangkhiew uba ieid ia ka Football, ban kyntiew ia kane ka Club bad ka jingjop dang shen ka Nongkseh kala wanrah ia a nam bad burom ia ka jylla bad ia ka jaidbynriew baroh kawei.
U Bah Ronnie V Lyngdoh ula pynpaw ia ka jingkmen ba ka NSSCC kala jop ia ka lympung ialehkai ha Sikkim bad khamtam haba kiba bun ialehkai kidei ki samla Khasi suda bad ula iaroh ia ka jingshimkhia u Bah Daniel Thangkhiew uba la ialam ia kane ka Club ban kynjoh ia ka jingjop shabar ka jylla bad kyrmen skhem ba un iai bteng ban ialam ia ka Club ban pawnam ruh wat ha ka dewbah Asia syndon.
U Bah Wailadmiki ula ong, ba ha ki snem kiba la leit noh, ki nongialehkai bad ki bahaiing bahasem kiba kyrshan ia ki, kila duh jingkyrmen namar ba ki nongialehkai kim ioh kam sorkar, hynrei ka sorkar jylla kala mynjur ia ka polisi treikam na ka bynta ki nongialehkai ka jylla, kumta kino kino ki nongialehkai ka jylla kiba wanrah ia ki takma ha ka National Games, Asian Games, Olympics ne Paralympic kin ioh beit beit ia ka kam sorkar bad kane kan ai mynsiem ia ki nongialehkai bad ia ki bahaiing bahasem ba kin ai jingkyrshan pura ia ki.
U Bah Wailadmiki ula kular ruh ban shimkhia ia ka dorkhas bad ban iashong pyrkhatlang bad ki nongialam shnong ryngkat bad ki nongialam jong ka Nongkseh Sports Social and Cultural Club ban lah ban iarap ia kane ka Club bad yn pyrshang ruh ban iarap hi nalade ruh ia kane ka kynhun ialehkai kaba la wanrah nam bad burom ia ka jylla baroh kawei.
