Shilong, Nailur 28: Ka Seng Khasi College hynne ka sngi kala pynkup burom ia 244 ngut ki samla bala pyndep iaka kyrdan pule Graduates.
Ia kane ka jingialang pynkup burom la pynshongkun da ka jingiadon lang u President ka Seng Khasi Sengkmie Rgh. O. Pyngrope, President ka Governing Body Rgh. R H. Dkhar, Secretary ka Governing Body, Principal barim ka College kong B. Pde bad ka kong Y. Swer nalor kiwei kiwei
Haba kren ha kane ka sngi u President ka Seng Khasi Sengkmie u Rgh. O. Pyngrope ula kyntu iaki samla pule ban trei shitom ban poi shaka thong haka lynti ba ki don ka jingthmu hadien habud.
U Principal ka Seng Khasi College bah W.B. Rynjah haba kren halor ka jingtreikam ka College ula ong ba donkam ka jing treilang na baroh ki liang ban kyntiew iaka pule puthi bad ula pynpaw ka jingkyrmen ba ki samla pule kin dang iai trei shitom ban wanrah ka burom ialade, iaka College bad iaka imlang sahlang.
Ki 244 ngut ki samla pule Graduates kila ai khublei iaki nonghikai, ki nongtrei bad iala ki kmie ki kpa kiba la kyrshan lang ha kane ka lynti ban poi shaka thong.
