Shillong, Naiwieng 05 : Ka Raid Laban Sports Social and Cultural Organisation (RLSSCO) ha ka sngi saitjain kala pynkup burom iaki 414 ngut ki khynnah bad samla pule kiba la wan shakhmat ha jingpule ka jongki ha ka jingialang kaba la long ha Soso Tham Auditorium Shillong.
Kane kadei ka sien kaba 19 ba ka RLSSCO hapoh ka jingialam u Bah Sanbor Shullai uba long ruh u Myntri Sorkar ka jylla ula pynkup burom iaki khynnah bad samla pule kiba shong ba sah ha ka South Shillong Constituency.
Ki don haduh 65 ngut ki khynnah bad samla pule kiba la wan shakhmat eh ha ki jingpule ha ki kyrdan bapher kila iohpdiang iaki Laptop bad ki khusnam katba kiwei pat kila ioh iaki khusnam bad ki jingai sngewbha kum ka dak ban pynshlur bad ban ai mynsiem iaki ba kin bteng ban minot bad trei shitom ban pynurlong iaka jingangnud ka jongki.
U Principal Secretary ka tnad Animal Husbandary & Veterinary u GHP Raju kum u Kongsan ula ai mynsiem ia kine ki sam;a kiba la shah pynkup burom ba kin dang bteng ban trei shitom ha ka jingim jongki khamtam ban burom ruh iaki nonghikai kiba la ai iaka jingnang jingstad.
Ula ong lada dei ba um long u heh ophisar IPS (Civil Servant) u da thrang eh ban long beit kum u nonghikai namar ka kam hikai kadei ka kam kaba don burom tam ha ka imlang sahlang.
Nalor kane, ula pynpaw ruh iaka jingsngewkhia halor ka jingieh shiteng por ki khynnah iaka jingpule bad kum ka dak jong ka jingai mynsiem iaka RLSSCO kaba trei na ka bynta ka bha ka miat ki khynnah pule ula pynbna ban noh synniang T.50,000 ia kane ka kynhun
