Nongpoh, Naiwieng 12: Ka Ri Bhoi Youth Federation (RBYF), Sengkmie kumba ju leh man la u snem, mynta u snem ruh ka la shim ia ka sienjam ban ai mynsiem ia ki samla pule kiba la pass bha ha ka eksam jong ka Secondary School Leaving Certificate (SSLC) bad ha Higher Secondary School Leaving Certificate (HSSLC) jong ka Science, Commerce bad Arts da kaba pynkup burom ha ka prokram kaba la long hapoh ka District Library, Nongpoh.
La wan ban ai mynsiem bad pynshit rhem ia kane ka prokram pynkup burom da u Ma Vincent H. Pala, MP ka Lok Sabha, ha ka jingiadonlang ruh u Bah Mayraldborn Syiem, MLA Nongpoh, u Dr. Celestine Lyngdoh, MLA Umsning, u Bah Damanbait Lamare, MLA Umroi, u Bah Bipul Thangkhiew, President ka RBYF sengkmie nalor ki nongialam ka RBYF, ki riew rangbah bad ki nonghikai.
Na ka liang ki nongkren ha kane ka prokram, ki la pynpaw ia ka jingkmen ban sakhi ba ki samla pule kane ka thain Ri Bhoi District ki la nang kiew sted namar ka jingtrei minot ka jong ki ha ki jingpule ka jong ki da kaba kyntu ruh, ba ki samla pule ki dei ban iaineh ka jinglong ban treishitom ha ryngkat ka jingpynleit jingmut ha la ki jingpule bad ban burom ia la ki nonghikai khnang ba ka lawei ka jong ki kan long kaba phyrnai.
Ki nongkren, ki la ai ruh ia ka jingiaroh ia ka seng RBYF kaba na kawei ka snem sha kawei pat ka la ju pynlong ia kum kane ka prokram pynkup burom ia ki samla pule kiba leh bha ha ki eksam bapher bapher kaban long kum ka jingaimynsiem ymtang ia kito kiba la pass bha hynrei wat ia kito kiba dang pynkhreh ban leit thoh ia kitei ki eksam ha ki snem ban nang wan. Ki la kitbok kitrwiang ruh ia ka seng ba kan nang lah ban iai shakri janai ia kane ka district bad wat ia ka jylla hi baroh kawei ha kiba bun ki liang.
