Shillong, Lber 22 : Ka President ka Ri-India Droupadi Murmu, kala pynkup burom da ka khusnam Padmashri ia u Rang Khasi Risingbor Kurkalang ha ka liang ka mattithaw (Arts) na Meghalaya ha ka Civil Investiture Ceremony ba long hynne ka sngi.
Ia u Bah Risingbor Kurkalong la ithuh kylleng kum u nongshna jingshna da ki tiar tynrai bad ruh kum u nongput nongtem nala tynrai.
Ia une u Rangbah la kha ha ka 19 tarik Naiwieng 1978 ha ka Iing ki Nongrep na Laitkyrhong, East Khasi Hills Distict bad u Bah Rising ula ieid ia ka put ka tem tynrai bad ioh mynsiem nala u jong u Kpaieid.
Ula sdang ban shna ia ki tiar put tiar tem nala tynrai bad u dei ruh uba tbit ban tem ia baroh kine ki jait jingtem. Ula sdang ban shna ia ka tiar tem tynrai bad die paidbah ha u snem 2001. U dei uba nyngkong eh na kane ka Shnong uba shna ia kine ki tiar nala tynrai.
U Bah Rising ula shah khot ha ka kyndon ki nongput nongtem tynrai ha u snem 1990 ha ka shnong jong u ban record ha All India Radio bad Doordarshan Kendra lyngba ka prokram bala buh thik ia ki jingput jingtem tynrai.
Kane kala pynpaw ia ka kam jong u kum u Nongput nongtem bad u nongshna tiar tem. Ula shang kylleng ki jaka ka Jylla bad ka Ri ban pyni ia ka sap kum u nongput nongtem bad ruh kum u Nongjop ha ka jingpynneh ia ka put ka tem nala tynrai ki Khasi bad ka jingshad. Baroh ki tiar jong u ki dei kiba shna da ka kti.
Pule lang ia kane: Hiar pateng ka kam pyntriem u ‘I Love You’ ha u para, pyniap klep ia u Rangbah
U bah Rising ula iashimbynta ha kiba bun ki rynsan pyni nam bad ki workshop kynthup ka workshop halor ki tiar put tiar tem nala tynrai bala pynlong da ka Sorkar Meghalaya.
Ula iashimbynta ha ka Vadya Darshan bala pynlong da ka Sangeet NatakAkademi, New Delhi ha u snem 2002 bad ruh ha ka 2nd Thoh Shun International Art Camp 2006 bala pynong ha Cherrapunjee (Sohra), East Khasi Hills District, Meghalaya.
Ula leit put leit tem ruh ha ka International Festival on Inter- Cultural Dialogue between North East India & South East Asia (2010). Ula shna bad tem ia ka jingrwai bala ai kyrteng ‘Mei Mariang’ naka thup jingrwai ‘Sai-thainki Sur’ bala pyllait paidbah ha u snem 2021 ha Naxos World. Ula shah khot sngewbha ha u Gareth Bonello, u Nongput nongtem ka ri Wales, United Kingdom ban tem bad u ha ka Rajasthan International Folk Festival (RIFF) kaba long ha Jodhpur (2022).
U Bah Rising ula ioh ia ka syrnod halor ka jingiashimbynta ha ka workshop halor ki tiar tem nala tynrai bala pynlong da ka Sorkar Meghalaya ha u snem 2008 bad ula ioh pdiang ruh iaka INTACH’s Martand Singh Memorial Award 2021 nalor kiwei kiwei.
