Shillong, K’lyngkot 13 : Ka Laitkor Dorbar Pyllun lem bad u MDC, ha ka sngi Nyngkong, kila pynkup burom ia ka kynhun ki thei ialehkai ka Shnong kiba ioh rah ia ka nam lahduh ha ka lympung ialehkai Women’s Football League Tournament 2024 ba la pynlong da ka Shillong Sports Association ha madan Polo.
U Bah Lambor Malngiang uba ju noh synñiang shibun ha ka ban ïarap ia ka Laitkor Sports and Cultural Club, ula wan iashimbynta kum u kongsan ha kane ka jingialang ha ka jingia donlang u Pa’iem Ainam Manik Syiem, Syiem ka Hima Mylliem, ki nongïalam ka Club, ki nongshong shnong, ki thei ïalehkai phutbol lem ki kmie ki kpa.
Kum ban shu kdew ba ka Laitkor Sports Club Women’s Football Team ka la pynliem ia ka Pay For Right Football Academy da 2 kol la 0 ha ka phainal jong ka lympung kaba la pynlong ha madan 1st Ground, Polo myn ha ka 30 tarik u Nohprah, 2024.
Na ka liang u MDC kum ka dak ka jingsngewkmen bad jingsngewsarong, u la noh synniang da ka khusnam pisa sha baroh ki dkhot ka kynhun ha ryngkat ki jingai sngewbha.
Haba kren ha ka jingïalang, u Bah Lambor u la pynpaw ba ki khun samla ki hap ban long kiba la khreh ban ïakhun pyrshah ia kiba bun ki jingeh ha ka jingïaid lynti jong ka jingim bad kino kino ki kam kiba ki leh ne trei. U la bynrap ban poi sha ka thong ka jingjop donkam ka jingskhem jingmut bad ka jingtrei minot
