Nongpoh, K’lyngkot 13 : Ka All Meghalaya Kick-Boxing Association (AMKA) hynne ka sngi Nyngkong, kala plie ia ka prokram ai jinghikai bala tip kum ka 8th State Level Kick-Boxing Training Camp kaba shi taiew lynter ha Umsning, ka ban kut haduh ka 18 tarik u Kyllalyngkot.
Ia kane ka Training Camp la plie da u Bah Eddie G Kharbani, uwei na ki riewpawkhmat ka Umsning bad kyrtong iakhun MDC ka UDP na Umsning ha ka jingiadonlang u Officer Incharge ka Umsning Police Station Elias Marak, u President ka AMKA Samuel Hashah bad kiwei kiwei.
Haduh 70 ngut ki samla kynthei bad shynrang kila wan na kylleng ka Ri-lum Khasi bad Jaintia ban iashimbynta ha kane ka jingai jinghikai.
Haba ai jingkren, u bah Samuel Hashah ula pynpaw ia ka jingkmen ba kum ka seng kaba khmih ia ka kam ialehkai Kick-Boxing ha Jylla, kala lah ban wanrah ia kane ka Training Camp ha Umsning.
U pyntip ha kane ka Training Camp, kan don ka jingai jinghikai kumba 6 sngi eiei bad ki jinghikai ki kynthup ia ka Kick-Boxing, Muay Thai, ka kam kilan met bad ruh ki lad jingiada ialade haba kyrmen ba ki samla kiba wan ban iashimbynta kin ioh ia ki jingmyntoi kaba khraw lyngba kane ka prokram.
U Bah Eddie G Kharbani ula ai ka jingiaroh ia ka AMKA kaba la iohi jngai halor ka jingdonkam ban wanrah ia kum kane ka prokram ha ka dong bad ka thain Ri-Bhoi khamtam ha Umsning. Ula kitbok kitriang ba kane ka prokram kan long kaba jop bad kan ai jingmyntoi shi katdei eh ia ki nongialehkai.
 hynne ka sngi Nyngkong, kala plie ia ka prokram ai jinghikai bala tip kum ka 8th State Level Kick-Boxing Training Camp kaba shi taiew lynter ha Umsning, ka ban kut haduh ka 18 tarik u Kyllalyngkot.){kind=link}