Shillong, Naitung 25: Ka long ka khyllipmat kaba sngewsarong ia ka jylla Meghalaya, ha kaba arngut ki ophisar pulit kiba kynthup ia u Bah Alan Marbaniang bad ka Wandalin Syiemiong kila shah pynkup burom ha ka sngi Palei na ka jingioh ia ka takma ksiar ha ka World Police & Fire Games 2025 kaba la long ha Birmingham, Alabama, USA.
La pynlong ia ka jingialang kaba kyrpang ha Soso Tham Auditorium, Shillong ban rakhe ia kane ka jingjop ia kaba la wan ban iashimbynta lang da u Symbud Myntri Rangbah ba khmih ia ka kam pohiing Bah Prestone Tynsong kum u kongsan bad u Myntri ka kam ialehkai u Bah Shakliar Warjri kum u kongsan symbud ha ka jingiadonlang ki heh ophisar pulit, ki paralok bad ki bahaiing bahasem.
Haba kren ha ka jingialang u Bah Prestone Tynsong ula iaroh ia kitei ki arngut ki ophisar pulit kiba la trei met bad mynsiem bad trei shitom bad ong ba katei ka jingjop ka jongki kadei ka jingai mynsiem ia ka tnad pulit baroh kawei bad ia ki samla nongialehkai kiba don ha kylleng kane ka jylla.
Ula ong ba kane ka jingjop ka jongki ym tang ba kala pynsngewsarong ia ka Meghalaya Police hynrei kala pyni ruh ia ka jinglah ka jylla ban don ha ki rynsan iakob ialehkai ha kane ka pyrthei.
Katba u Bah Shakliar Warjri ula ai khublei ia kine ki arngut ki ophisar bad ula iaroh ruh ia ka jingtrei shitom bad ia ka mynsiem ialehkai ka jongki bad ula ong ba ka sorkar jylla ka iengskhem ha kaban kyntiew ia ka kam ialehkai na ka bynta ki briew kiba don ha ki uniphom bad kan iai bteng ban kynshew tyngka na ka bynta ban ai ia ki jinghikai pyntbit bad ia ki jingdonkam.
Kine kiba la ioh khur ia ki takma kila shah pynkup burom da ki jingai sngewbha bad ka sertiphiket halor ka jinglah ka jongki ban ialehkai bha. Ka jingiakhun pyrshah ka jongki ia kiwei pat ki nongiashimbynta na kylleng ki ri bad ka jingjop ka jongki kadei kaba la iaroh kum ka jingrah shajrong ia ka burom jong ka jylla Meghalaya ha ka rynsan ialehkai ha ka pyrthei.
Ka World Police & Fire Games kadei ka jingiakob kaba kongsan ha kaba ki ophisar kiba khmih ia ka ain, pulit pynlip ding bad ki pulit kiba shakri ha ki phatok na kylleng ki ri ki wan lang ha kawei ka rynsan ban iakhun ha ki jingialehkai ki bapher bapher.
Hashwa ban pynkut ia kane ka jingialang, kala don ka jingiarisa bad jingkmen kum ka jingai khublei ia ka jingtrei shitom bad ka jingtbit jong u Bah Alan Marbaniang bad ka Wandalin Syiemiong.
