Shillong, Iaiong 02: Ka IIM Shillong, hynne ka sngi kala pynlong iaka 14th Annual Convocation ha kaba 5 ngut kila pyndep iaka PhD, 238 ngut ki samla pule kila pyndep iaka PGP-2021-23, 43 ngut kila pyndep iaka PGPEX batch of 2022-23, 16 ngut kila pyndep ia ka PGPWE 2020-22 bad 47 ngut kila pyndep iaka PGPWE 2021-23.
Ia kane ka jingialang la plie da u Rajeev Chandrasekhar, Myntri khynnah ka sorkar pdeng uba khmih iaka Electronics and Information Technology & Skill Development and Entrepreneurship, lyngba ka Video Conferencing kum u kongsan bad u Gaurav Swarup, Co-Chairman & Managing Director of Paharpur Cooling Towers Ltd, kum u symbud kongsan.
U Rajeev Chandrasekhar ula ong, ba ka ri India kala kiew bha lyngba ka sienjam kaba la tip kum ka Digital India kaba la iarap ha ka ban kyntiew iaka ri, watla kiwei ki ri kila mad iaka jingeh bad khamtam ha ka jingkyrduh pisa, hynrei ka ri India kala iai bteng ban roi bad kiew shaprang.
Ula kyntu ia ki samla pule ka IIM Shillong ban pyndonkam iaka jingpule kaba kila ioh ha kaban noh synniang na ka bynta ka roi ka par jong ka ri bad ban wanrah iaka jingkylla ha ka imlang sahlang.
Ula pynpaw ruh ba lyngba ka New India ki don bun ki lad ki lynti naka bynta ki samla ka ri ban pynurlong iaka jingangnud bad iaka thong ka jongki lyngba ka jingtrei shitom ka jongki hi.
U Kongsan ula kren ruh halor ki sienjam jong ka sorkar ban ailad ia ki samla ba kin seng kam lajong bad ula kyntu ia ki ba kin shim ia kitei ki kabu kiba la ai da ka sorkar.
U Chairman jongka Board of Governors, u Shishir Kumar Bajoria, ula ai khublei ia kitei ki samla pule kiba la pyndep iaka jingpule ka jongki bad ula banjur iaka jingdonkam ban pyndonkam ia buit bad iaka sap ka phong ha kaban tei iaka ri bad ula kyntu ia ki samla ba kin pyndonkam iaka jinghikai kaba kila ioh na ka bynta ban tei iaka imlang sahlang.
Ha katei ka jingialang la sakhi ia ka jingwan iashimbynta jong ki 238 ngut ki samla pule kila ioh pdiang ruh ia ki jingtyrwa kam na ki 63 tylli ki kynhun ha ka lian jongka Consulting & Strategy, Finance, General Management, Human Resources & Operations, IT & Analytics bad Sales & Marketing.
