Shillong, Risaw 31 : U Myntri ka Tnad Public Health Engineering (PHE) Marcuise N Marak ha ka sngi Ba-ar, ula pynksan ba ka Tnad PHE kala sam ia ka umbam umdih kaba khuid sha ki nongshongshnong ka Shillong haba pynpaw ia ka jingartatien ia ka um ba lum nongmuna da ka seng FKJGP, kaba pyni ba haduh 44 tylli ki Shnong ki ioh ia ka umbam umdih kabym shngain.
Haba iakren bad ki lad pathai khubor, u Myntri ula ong ba ka Tnad jong u, kala pynthikna ba ka um ba ka sam sha ki paid nongshongshnong ka dei kaba khuid bad kaba biang ban dih.
Kane ka jingkynthoh u Myntri kala mih halor ka khubor ba dang shen bala pynmih da ka FKJGP ba ong ba haduh 44 tylli ki Shnong ha Shillong kila ioh ia ka umbam umdih ka bym shngain kat kum ka Food Safety and Standards Authority of India (FSSAI) standard.
Kane ka long kat kum ka kaiphod na ka jingleh test jong ka State Food Testing Laboratory Commissionerate of Food Safety, Pasteur Hills, Shillong ia ki nongmuna bala lum da ka FKJGP na ki Shnong ka Nongbah Shillong.
Ka FKJGP kala leit ban aiti ia kane ka kaiphod jong ka State Food Testing Laboratory Commissionerate of Food Safety, Pasteur Hills, Shillong ha u Myntri Rangbah ka Jylla myn haka 3 tarik Risaw, ba un tuklar mardor bad ban leh eiei noh.
Halor ka jingkylli, u Marcuise ula ong “U Chief Engineer jong nga, ula dep ai ka jingpynshai halor kane ka kam. Hynrei, nga kwah ban ong hangne ba manla ka sngi, ka Tnad PHE hashuwa ban sam ia ka um sha Nongbah Shillong, ka ju leh ia ka test ha Mawphlang Treatment Plant”.
“Ngi tan um na ka wah Umiem bad ngi la pynkhuid ia ka hapoh ka Mawphlang Treatment Plant bad nangne pat, ngi la wan pynpoi ia ka um sha hynriew mer shiteng, hangtei ka don ka top bad nangne pat la pynpoi sha saw mer bad hangne ruh ka don ka top bad nangne pat ngi la sam ia ka um sha ka top ka Municipal bad kiwei ki top kiba don ha Shillong. Namar kata, ka um ba sam da ka Tnad PHE ka dei kaba khuid bad ba long ban dih” ula bynrap.
U Myntri ula pynpaw ia ka jingartatien ia ka um bala lum nongmuna da ka FKJGP bad ia ka jaka kaba kane ka seng kala phah leh ia ka test.
“Hynrei, na ka bynta ka jinghun ki paidbah, ngi lah ai ia ka umbam umdih kaba khuid ia ki paidbah ka Shillong hynrei lada shem ba don kino kino ki top um ka PHE ki dei kiba jaboh, ngin sa leh eiei halor kane” ula ong.
