Shillong, Naiwieng 02 : U Symbud Myntri Rangbah ka Jylla Bah Prestone Tynsong hynne ka sngi Balang ula ong ba ki 342 tylli ki Longiing ka Them Metor, kim dei satia ki nongshongshnong ba be-ain.
“Phim lah ban ong ba ki (342 Longiing) ki dei ki briew ba shong beain” ong u Bah Prestone haba iakren bad ki nongthoh khubor halor ka jingkynnoh bala pynmih daki kynhun Sengbhalang.
“Ka jingkylli ba ki dei ki briew ba shong beain kam mih satia namar baroh ki jingtip bad ki record jong kine ki Longiing kila don hapoh ka Ophis jong ka Shillong Municipal Board (SMB) bad ruh ha ka Iingkashari Meghalaya High Court” ula ong.
Halor ka jingtyrwa jong ka Sorkar ban pynkynriah ia ki sha ki quarter ka SMB, u Bah Prestone ula ong b aka Harijan Panchayat Committee (HPC) kam pat ai ktien satia ia ka rai halor kane ka kam haba bynrap, hynrei ka Iingkashari kala dep bthah ia ki ban file ia ka affidavit hapoh katto katne taiew naduh mynta.
Ha ka 21 tarik u Risaw, ka Iingkashari kala bthah ia ka HPC ban jubab halor ka jingtyrwa jong ka Sorkar Jylla hapoh ka 4 taiew.
Ka Iingkashari kala buh ban bishar biang ia kane ka kam ha ka 16 tarik u Rymphang.
Ha ka 29 tarik Nailur, ka Sorkar Jylla kala aiti ia ka blueprint sha ka HPC ha ka jingialang, kaba kdew ia ka rai ban pynshna ia ki Iing ba bun mala ha ki quarter jong ka SMB ban pynkynriah ia ki 342 tylli ki longiing.
Ka Sorkar Jylla kala kyntait ia ka jingtyrwa jong ka HPC ban ai mar 200 square meter ka jaka sha kawei pa kawei ka Longiing hapoh ka European Ward nalor ban ai ruh ia ka bailut baisep ha kaban shna ia ki iing jong ki.
Hadien ka jingialang, u Secretary ka HPC Gurjit Singh ula pynpaw ia ka jingsngewkhia halor ka jingkyntait ka sorkar ia ka resolution ba phra tylli ki mat jingdawa.
