Shillong, Nailur 21 : U Symbud Myntri Rangbah ka Jylla Bah Prestone Tynsong hynne ka sngi Balang, ula pynksan ba ka jingiaid jong ki trok kit dewiong kam dei satia ka kam be-ain namar ki dei kiba shalan ia palat 1 lak MT u dewiong bala dep tih bad bala lilam kat kum ka hukum ka Iingkashari.
“Hangno don kata ka jingkhaii tuh ia u dewiong mynta ba la dep ban lilam? Phi tip kham bha ba ka Coal India Limited kala pyndep lut ia baroh ki jingdonkam. Ym don ia ka 1 lak MT na ka 32 lak MT duna u dewiong, la lilam sha ki briew kiba la ioh challan bad ki trok jong ki, ki dei kiba iaid mynta ha ki surok” ong u Bah Prestone.
Kat kum ka jingong jong u, ka jingiaid ki trok ka dei kaba la ioh jingbit kat kum ka jingioh challan.
“Namar kata, nga iathuh ha phi ba ki trok kiba iaid ki dei kiba kit ia u dewiong bala lilam” ula ong haba pyntip ba shen, ka jinglilam kan sa sdang noh na ka bynta ka West Khasi Hills bad Garo Hills shisien bala pyndep jong ka Jaintia Hills.
U Bah Prestone ula pyntip ia kane halor ka jingkem ka HITO ia 18 tylli ki trok kit dewiong dang shen haba kynnoh ba kine ki trok ki kit be-ain khlem ka Challan ia u dewiong bad ba ki Pulit ka Mawryngkeng Police Station kila kyntait ban register case ia ka ejahar bala mudui.
U Symbud Myntri Rangbah ula ong ba ki Pulit kim lah ban kyntait ha kaban register ia ka FIR. “Ka dei ruh ka kamram jong kane ka Seng ban buddien naba ki Pulit kim lah ban kyntait ha kaban register ia ka ejahar la ka dei kaba iaid kat kum ka challan lane khlem challan lane khlem ki kot ki sla” ong u Symbud Myntri Rangbah.
Haba pynpaw ba ym dei ban shu ngeit ia ki jingong ki briew ba ki trok ki iaid beain, u Bah Prestone ula ong “Khie leit iakynduh ia ka Tnad Mining & Geology bad kylli ba haduh katno tylli ki challan ba kila dep ai ha ka jaka ban shu sngap ia ki briew”.
Halor ka jingkynnoh ba ka kynhun “High Level” ka pyniaid ia ka jingiaid beain ki trok ha Jylla, u Bah Prestone ula ong “Balei ba kim jer kyrteng ia baroh ki dkhot kane ka High Level. Mano kita ki High Level?, Ym dei ban shu sngap ia uwei u ar tang ba ki ong ba ka dei kaba shisha. Wad la ki trok kiba iaid ha surok ki dei kiba don ia ki kot ki sla ne em. Lada kim don ia ki kot ki sla, ki Pulit kin kem hynrei lada kim don, phim lah satia ban kem”.
Haba kdew ia ki jingkynnoh ka Congress ba ka don ka jinglum pisa beain kaba jur bha na ki trok, u Bah Prestone ula ong ba kam don jingmut ban jubab ia kum kine ki jingkynnoh kiba khlem nongrim.
“Ki jingkynnoh ba khlem nongrim ki lah ban mih man ka por, ha kano kano ka por hynrei ai ba ngan ban jur ia kawei, kino kino ki jingkynnoh da sngewbha ban pynshisha kat kum ki Ain ba don la ka dei ia u Myntri Rangbah, u Symbud Myntri Rangbah ne iano iano ruh, ka Ain ka treikam lang kumjuh ia baroh” ula ong.
