Pynksan u Director ka NEIGRIHMS | Ka Institute kala bud ryntih ia ki kyndon ka DoPT ha ka thungkam thungjam

Shillong Iaiong 11: U Director jong ka North Eastern Indira Gandhi Regional Institute of Health & Medical Sciences (NEIGRIHMS) hynne ka sngi Thohdieng ula pynthikna biang baka Institute kala bud ryntih ia ki kyndon thungkam thungjam kumba la pynmih da ka Department of Personnel and Training (DoPT) bad pynshai ruh ia ki katto katne ki bynta ha kaba iadei bad ka jingpynrung kam ba dang iaid mynta.

Kane ka jingpynshai ka jongu kadei kum shi bynta na ki jingsngewkhia kiba la pynpaw da ka seng Khasi Students’ Union (KSU) bad ka Hynniewtrep Youth Council (HYC), ha kaba dang shen kila pynlong ia ka jingiakhih ha NEIGRIHMS.

U Dr Mehta ula ong ba ka jingpynmih ia ki jingpynbna laitkam ne Advertisement na ka bynta ki kam kiba lait, kam dei satia ka ‘Fresh Recruitment’ hynrei ka dei ka ‘Backlog Vacancies’ kaba la mih na ka jingbym pdiang, ka jingbym wan trei ne ka jingbym don ia ki kyrtong kiba biang ha ki kyrdan bapher bapher ha ki jingpynrung kam kiba la leit noh.

“Baroh ki jingthepkam ha NEIGRIHMS ki dei kiba la pynlong thikna bha bad ia kane kaba mynta, ka dei kaba la leh katkum ka ‘Model Roster bad Regional Roster’ kaba long kongsan katkum ki kyndon jingbthah jong ka DoPT, ban pynthikna ba kadei ban don ka jingbud ryntih ha kaba iadei bad ka bhah thungkam ne ka Reservation Policy na ka bynta ki SC, ST, OBC, EWS bad PwBD.”

Haba pynshai thik ha kaba iadei bad ka jingsngewkhia ban ioh rung kam ki trai ri trai muluk, u Director ula ong, “La kdew ha ka Advertisement jong ka jingthep kam ha NEIGRIHMS ia kaba la pynmih salonsar ha ki kot khubor ka jylla bad bad kumjuh ruh ha ki khubor lait kam ne Employment News katkum ki kyndon jingbthah bad la buh ruh ia kane ha ka website jong ka NEIGRIHMS khnang ba kin don bun ngut ki trai jylla kiban iashimbynta. Ka jingbhah ia ki OBC bad EWS kadei kaba la bud ryntih katkum ki kyndon jong ka Sorkar Pdeng bad ka bor jong ka ain.

Ha kaba iadei bad ka jingsngewkhia halor ka jingthungkam da ka Ratio ia ka kyrdan Nursing Officer, u Director ula pynshai ba kam shim la don kano kano ka kyndon ha ka Recruitment Rules kaba la don lypa na ka bynta ka Ratio kaba 80:20 ki kynthei bad ki shynrang.

“Ka NEIGRIHMS kala kyrpad ha u Naitung 2024 ia ka Ministry of Health and Family Welfare, jong ka Sorkar India ban buh ia katei ka kyndon, hynrei ka Ministry ha u Nailar 2024 kala bthah ban yn ym leh ia katei. Ka jingkyrpad kaba don ruh iaka jingkyrshan kaba pynskhem ia katei, la phah ha kine ki khyndiat sngi sha ka Ministry” ula ong.

Ha kaba iadei bad ka Centre ban pynlong iaka eksamin na ka bynta ka Computer-Based Tests (CBT) kaban pynlong da ka HLL Life Care Limited, ka kompani jong ka sorkar pdeng, u Dr Mehta ula pyntip ba la pynkhreh ia ki sienjam ban pdiang bun ia ki samla ka jylla Meghalaya ha ki jaka thoh eksamin ha Meghalaya. Ki kyrtong ki bym lah ban wan ialeh ha ka jylla Meghalaya, kumta ki lah ban leh noh ha ki centre kiba don marjan, nuksa kum ha Guwahati, Assam.

“Nalor kane, ia kane ka eksamin kaba mynta ka kynti yn pynlong da ka NEIGRIHMS lyngba katei ka Agency kaba la kdew haneng bad kam dei satia da ka NORCET kumba la leh ha ka jingthung kam kiba la dep”.

U Dr Mehta ula banjur ruh ba la buh ia ki atiar kiba paka ha NEIGRIHMS ban pynthikna ia ka jingshngain jong ki nongpang, ban pynneh ia ka jinglong jingman hapoh jong ka Hospital bad ban ai ia ka sawdong sawkun kaba shngain khamtam eh na ka bynta ki nurse kynthei bad ki nongpang.

U Director ula pynkut ruh ia ka kyrwoh ka jongu da kaba pynthikna ba ka NEIGRIHMS ka iengskhem ha kaban pyniaid beit ia ki kam ki jam ha ka lynti kaba khuid ba suba bad kaba don ia ka jingkitkhlieh bad ka jingpynrung kam kaba long salonsar da kaba bud ryntih ia ki kyndon bad ki jingpyrkhing jong ka Sorkar Pdeng.