Nongpoh, Jymmang 27 : U Deputy Commissioner ka Ri-Bhoi, Arpit Upadhyaya, ula pynksan ia ka Nongpoh Town Committee (NTC) kum ka trai jong ka jaka kaba la kam da ka Raid Nongpoh, kaba don hakhmat ka Nongpoh Town Shopping Complex.
Ka jingiakajia ia kane ka jaka kala mih hadien ba ka Raid Nongpoh kala kam trai ia ka jaka ba thmu ban tei ia ka Interlocking Concrete Block Pavement kaba dei ka jaka pynieng kali paidbah, hakhmat jong ka Shopping Complex.
U Deputy Commissioner ula ai ia kane ka rai haba bishar ia ka jingujor, kaba wan na ka Nongpoh Town Committee pyrshah ia ka Raid Nongpoh.
Haba iakren bad ki nongthoh khubor, u Arpit Upadhyaya ula pyntip ba ula phah tohkit ha u Magistrate halor ka jingujor bad kane ka jingtohkit kala shem bad ka jaka ba don jingiakajia, ka dei kaba hap hapoh ka Nongpoh Town ia kaba ka Raid Nongpoh kala dep ban ai ia kane ka jaka sha ka NTC. U iathuh ba ka NTC kala dep siew ia ka bai lut bai sep kaba kot T. 10,000 ha u snem 2000.
Nalor kane, u Deputy Commissioner ula pynshai ruh ba wat ka Sorkar Jylla kala dep ruh ban siew ia ka bai jaka ba ka shim ha u snem 2006 ban pynheh ia ka surok 4-lane.
Ula pynskhem shuh shuh ia ka rai da kaba ong “Ka map jong ka Tnad Urban Affairs kala pynshisha ruh ba katei ka jaka ka dei kaba hap hapoh ka Nongpoh Town Committee lane ka jaka jong ka Sorkar Jylla”.
U Deputy Commissioner ula pyntip ba ki bor District ki dang pynlong ia ka jingtohkit ba kham bniah ia kane ka kam haba ong “Lada dang don ka jingkyntur pud ne kam be-ain ia katei ka jaka, ka bor District kan sa leh ia kaba donkam”.
Ka Nongpoh Town Committee ka shna ia katei interlocking concrete block pavement ym tang ban pynieng kali hynrei kan long ka jaka paitbah ban pyndonkam kum ha ki jingialang paidbah, awareness programme bad kiwei kiwei.
Lah ban kdew ba katei ka jaka ka dei ruh kaba ju pynlong ia ki jingialang thang moti haba don ki jingjia sngewlem kiba ktah ia ka imlang sahlang.
