Baroh ki jingkynnoh kim lah ban pharia ia ka MDA
Shillong, Jylliew 24: U Myntri Rangbah barim ka Jylla bad Chief Adviser ka Sorkar Jylla ba mynta, Dr D.D.Lapang ula pynksan ia ka jingtbit treikam jong ka Sorkar Meghalaya Democratic Alliance (MDA) hapoh ka jingialam u Conrad Kongkal Sangma kum u Myntri Rangbah bad ong “baroh ki jingkynnoh jong ki Liang Pyrshah kim lah satia ban pharia ia kane ka Sorkar”.
“Watla ki mih shibun ki jingkynnoh pyrshah ia kane ka sorkar ba mynta hynrei kane ka Sorkar ka dei kaba iatylli bad kine ki jingkynnoh kin ym lah satia ban pharia ia ka. Kam pher ki jingkynnoh ba kumno kumno ruh hynrei ki paralok ba iatreilang ha ka MDA ki dei kiba iatylli” ong u Dr Lapang uba la shakri kum u Myntri Rangbah ka Jylla haduh saw sien.
U Dr Lapang ula ong ba kane ka Sorkar ba mynta kala lah ban leh shibun kiei kiei. “Ka jingwan tuid ka pisa na Delhi lyngba ka Sorkar MDA ka long kaba jur bha. Ngi la sakhi ia ka jingmih ki project thymmai, ki kam pynroi ba thymmai hynrei ki jingkynnoh na ka liang pyrshah kan iai mih beit”. Ula ong.
Ka jinglong nongialam jong u briew ba trei shitom kan shah kynthoh beit hynrei baroh kine ki jingkynthoh na ka Liang Pyrshah kidei ki bym don nongrim namar kim lah satia ban pynshisha ia ki jingkynnoh ba kila pynmih pyrshah ia kane ka Sorkar, ong u Dr Lapang.
“U Conrad Sangma u dei u briew ba trei shitom, u dei uba stad bad kum u Myntri Rangbah ka Jylla ula lah ban pynbeit ia ki kam ki jam ba iadei bad ka Sorkar Pdeng ne ha ka Jylla ruh kumjuh. Ka burom kan leit sha u halor ka jinglah treikam jong kane ka Sorkar” ong u Dr Lapang.
Haba kylli, u Dr Lapang ula pynpaw ba um lah satia ban batai lypa la u Conrad un dang iai neh ne em ban long kum u Myntri Rangbah ka Jylla hadien ka elekshon MLA 2023.
“Ngam lah ban ong eiei ia mynta, ha ka riti synshar paidbah, u Myntri Rangbah hi un wan naka Liang ba jop bun eh ki MLA bad um don ba lah ban batai lypa mano ban ioh bun eh ki MLA ha ka elekshon. Hynrei kaei kaba nga lah ban ong ba kane ka Sorkar ba mynta kala treikam bha bad lada ka NPP ka ioh biang ia u nombor ha ka elekshon ban wan, nga kyrmen ba kin jied biang ia u Conrad kum u Myntri Rangbah ka Jylla” ula ong.
Une u Myntri Rangbah barim ka Jylla ula ai ruh ka jingkyrkhu kyrdoh ia ka kyrtong ka NPP na Nongpoh Constituency Kong Macdalyne S Mawlong, kaba dei mynta ka Executive Meber jong ka KHADC.
