Shillong, Rymphang 26 : U Myntri Rangbah ka Jylla Conrad K Sangma ha ka sngi Balang ula ong ba ki degree bala ai da ka University of Science & Technology Meghalaya (USTM) ki dei kiba shisha bad ba ithuh da ka UGC.
Kane ka jingkynthoh kala mih hadien ka jingshah kem ba dang shen jong u Chancellor ka USTM Mahbubul Hoque ha ki Pulit Assam, haba iadei bad ka case bala register ha Sribhumi District, Assam, hadien ki jingkynnoh ba u donkti ha ki kam leh thok hapoh ka skul ba pyniaid da ka ERD Foundation, kaba u Hoque u dei u Chairman.
U Conrad ula kyntait ban kynthoh halor kane ka kam bad ong “Nga pynshai na ka bynta ka USTM bad ka Meghalaya da kaba ong ba baroh ki jingai jingbit bad ki kot ki sla ki dei kiba biang lut nadong hadong bad kam don satia ka jingleh bakla. Halor ki jingkynthoh jong u CM ka Assam, kane ka dei ka kam kaba u hap ban jubab, ngam lah ban jubab na ka bynta jong u”.
“Khlem pep, ki degree ba ai da ka USTM ki dei kiba shong ain. La ai ia ki la bun snem mynta. Ngam tharai ba phin kylli ia nga halor kane. Phi lah ban iakynduh hi ia ki briew, ki Heh ki hain bad ki samla pule ba pule hangtei bad kin sa iathuh ha phi ba ka USTM ka don ia ki jingtei bad ka sawdong sawkun kaba biang palat, ki nongtrei kiba biang bha bad kila noh synniang shi katdei eh sha ki samla jong ka Jylla. Ngi kmen ba ka University kum ka USTM ka don ha Meghalaya” ula ong.
