Shillong, Nohprah 05: U Myntri Rangbah ka jylla Conrad K Sangma hynne ka sngi Ba=ar, ula ong ba ka jingshim rai jong ka sorkar ban pyndonkam noh da ki kot skul NCERT ka long ban iarap ia ki khynnah skul ba kin lah ban iakhun ha ka National Level.
U Sangma ula kren ia katei haba pynshai halor ka jingkynthoh jong u nongialam ka TMC bad u Myntri Rangbah barim ka jylla Dr Mukul Sangma ba ong ba ka sorkar kam dei ban pyndonkam da ki kot skul NCERT bad ka jingshim rai ka long kaba bakla jur.
“Peit ka NCERT ka dei kaba la bud namar kiba bun kiei kiei ki ban don ha ka haba phai sha ki sobjek kum ka Mathematics, Science bad kiwei dei ki sobjek. Ngam don eiei ban kren pyrshah ia ka jingkren jong uwei pat u nongialam hynrei ka sorkar bad ki tnad kila shim ia ka rai namar kaba nyngkong eh, ka long ba ngi sngew ba ki khynnah ki donkam ban iakhun ha ka National Level bad kumta ki don ki bynta kiba la jia hapoh ka jylla ka long ba ia ki kot kiba dei naka bynta ka klas VI ne VII la hikai pat ha Meghalaya na ka bynta kiba shong ha ka klas VIII ne IX katba ha ka NCERT la hikai ha ka VI,” ula ong.
Ula ong ba ki don ki bynta ha kaba iadei bad ka National Level, haba la pynlong ia ka jingkhmih bniah, ki kyndon jong ka NCERT ki long ki bynta kiba kongsan bha ha ki katto katne ki bynta.
“Ka bynta kaba kongsan tam ka long, lehse ka lah ban long u ‘dkhot’ ym shim la sngewthuh ne ym sngewthuh ia kaei kaba ngi pyrshang ban leh ban shim ne pyndonkam iaka Syllabus na ka bynta ka jingdonkam ka jong ngi. Kumta ngin sa lah ban iakhun ha ka National Level bad ki Course kin long kiba rytih lang. Ngin lah ruh ban don iaka rukom treikam kaban long kaba bha shuh shuh bad haba donkam ngin hap ban shim ia katei. Ngin sa pyndonkam ia katei da kaba iaid ruh katkum ka kolshor, histori bad kaj inglong jingman hangne bad ngin sa pynthikna ia ka Syllabus kaba pher naka bynta ki sobjek bapher bapher,” ula ong.
