Shillong, Nohprah 21 : U Chief Executive Member (CEM) ka KHADC Bah Pyniaid Syiem ha ka sngi Palei ula ong ba kan don aiu ban lehrain ia u bad ia ki Executive Member (EM) ba kin leit khynra hi ia ki kam khaii be-ain hapoh u pud u sam jong ka Council.
U CEM ula kynthoh ia kane haba jubab ia ka motion bala wanrah da ka Liang Pyrshah ka United Democratic Party (UDP) ba pyrshah ia ka rukom treikam jong ka Executive Committee.
U MDC ka UDP Bah Jambor War ula buh jingkylli halor ka jingdonkam ia u CEM bad ki EM ba kin leit khynra hi dalade ia ki kam khaii beain namar ka Council kala don ia ka Enforcement Wing ban leh ia kaei kaei kat kum ka jingbthah jong ka Executive Committee.
Haba pynksan ia ka jingle ka EC ban khanglad ia ki kam khaii be-ain, u Bah Pyniaid ula ong “Ngi la pynlong ia ka jingkhynra ym ban pynlehrain ialade hynrei ngi shu pyrshang ban tynrong lem ia ka jingkitkhlieh. Ha ka jingshsha, nga kwah ban kyrpad ia ka EC ba thymmai ba kan leh kumjuh ban tip ia kaei kaba jia sha surok namar ki don ki jaka ha kaba phin nym iohi ia ki trai riewlum ba kin khaii. Ka jingle ka EC kala ai mynsiem ia ki Nongtrei ba kin trei shitom ha kaban tehlakam ia ka jingkhaii beain”.
Ula ong ba ka Tnad Enforcement kala mad ia ka jingeh na ka jingduna nongtrei bad tang 70 ngut na ki Pulit Enforcement kila khmih ia ki 5 tylli ki District kiba hap hapoh u pud u sam jong ka Council.
Halor ka jingleit mudui mukotduma ki nongkhaii sha IIngkashari, u Bah Pyniaid ula ong ba ka Council kan dang ban shim rai la kan ai Trading Licence ne em ha kaban shalar mar hapoh ka thain Majai.
