Shillong, Nailur 06 : U Nongialam ka BJP bad Myntri Sorkar Bah A.L. Hek ula pynksan ba ka jingtyrwa “One Nation, One Election” jong ka Sorkar Pdeng ka dei ka ban ai jingmyntoi bha sha ka roi ka par jong ki Jylla bad ka Ri.
Une u Nongialam ka BJP ula ong, ka Ri India kala dei lypa kawei ka Ri (one nation) bad kawei ka elekshon hapoh ka Ri ka dei kaba bha palat.
Kat kum ka jingong jong u, “Ki don bun tylli ki Jylla hapoh ka Ri India bad ha ka shisnem, ngi don lai-saw tylli ki elekshon. Ngi don ki elekshon Assembly, elekshon MP, elekshon Panchayat, elekshon MDC”.
“Lada kawei ka Jylla ka don elekshon, la treikam ka Model Code of Conduct kaba khang ia ka jingiaid ki kam pynroi. Kawei hadien kawei, katno shuh ki MCC kin khang ia ka jingiaid ki kam pynroi” ula bynrap.
U Bah Hek ula kdew ruh ba lada phai sha ka jinglut jingsep “Ka pisa kaba bun bah la pynlut ha man ka por ba pynlong ia ki elekshon, nalor ki bor pahara bad ka por jong ki Nongialam ruh la shu lut tang ha ka elekshon” ula bynrap.
Ula ong “Dei ba don noh tang kawei ka elekshon, kato ka jinglut jingsep ba pynlut man la ki elekshhon la lah ban pyndon kam noh sha ki kam pynroi jong ki Jylla bad ka Ri India baroh kawei”.
Ula ong “Ka One Nation, One Election” ka dei kaba bha bad kaban pynmyntoi bha.
