Pynksan ka MHRC ba khlem pynkhein hok longbriew u SP barim ka EKH

Jah rngai ka HYC bad HITO ban leit ai sakhi hakhmat ka Commission

Shillong, Nailar 05 : Ka Meghalaya Human Rights Commission (MHRC) kala pynwai noh ia ka mukot duma pyrshah ia u Superintendent of Police (SP) barim ka East Khasi Hills Rituraj Ravi hadien ka jing pynthikna ba kam shym la don satia ka jingpynkhein ia ka hok longbriew ba ula leh pyrshah ia ka kong Bindas Syiem ha ka jingiakhih shah jingit ha u snem bala lah.

Ka Commission kala shem ba ki jingbatai jong ki nongsakhi kim shym iahap halor ka jingjia bad ka jingkynnoh pyrshah ia u Ravi ka dei ka bym lah ban pynshong nongrim.

“Kumta, naba ym don satia ka jingpynkhein ia ka hok longbriew ba long pyrshah ia nongshah mudui Rituraj Ravi, kumta la pynwai noh ia ka mukotduma”ong ka Commission ha ka hukum ba pynmih ha ka 25 tarik Naitung.

Ia kane ka ujor la mudui da Enlang Sawian, ba kynnoh ba ha ka 9 tarik Jylliew 2024, ka kynhun ki Pulit bala kieng atiar bha hapoh ka jingialam u Ravi, kila pyrshang ban weng jubor ia ka kong Bindas na ka jingiakhih shah jingit khlem da don lang ki Pulit Kynthei lane ki Executive Magistrate.

Ha ka 13 tarik Jylliew, 2024, artylli ki ujor la mudui da u President bad Vice President ka Hynniewtrep Integrated Organization (HITO) ba kyrpad ban leh eiei pyrshah ia u SP ka EKH namar ka jingkynnoh ba pyrshang ban weng jubor ia ka kong Bidas na ka Secretariat Building, kaba la iakhih halor ka jing slem ban maramot ia ka surok Nongpoh-Umden. Kawei pat ka ujpr ka dei kaba la mudui da ka kong Purity Phawa bad Marylis Mawrie.

Ka MHRC kala shimkhia ia kine ki artylli ki ujor bad kala register case kat kum ka case no 29/2024 bad 30/2024. Namar kine ki ujor ki dei ia kajuh ka mat ba ka MHRC case no 28/2024, la pynmih hukum ban klop lang noh ia kine ki case baroh hapoh ka case no 28/2024.

Ka Commission kala phah ia ka notice sha u Director General of Police Meghalaya bad bthah ia u Rituraj Ravi ban wan mih hakhmat ka Commission.

U Enlang Sawian (na ka HYC) u nongmudui ha ka MHRC case no 28/2024, u Donbok Dkhar bad Shaniah Nongrum (na ka HITO) kiba dei ki nongmudui ha ka MHRC case no 29/2024, kim shym la wan mih satia hahkmat ka Commission wat hadien ba ia ki hukum bala pynmih da ka Commission ha man ba dei ka sien shong bishar, la phah copy sha ki.

Ki nongmudui jong kine ki artylli ki case kim shym la shim satia ia kano kano ka sienjam ba iadei bad kane ka case lane wan mih shakhmat kum ki sakhi ia ka briew ba shah ktah.

Ka hukum ka ong “CW2 Kyrmen Uriah bad CW3 Purity Phara ha ka jingwan ai sakhi, kila pynpaw ba ki jingleh jong u Superintendent of Police ki dei ka jingpynkhein ia ka hok longbriew ka kong Bindas Syiem kum ka riew kynthei bad u dei ban shah pynshitom kat kum ki kyndon ka ain. Hynrei ha ka cross examination da u nongshah mudui, la buh jingkylli ia ka CW1 (Bindas Syiem) “Phi iohsngew ia nga ne kino kino ki Pulit ba kren ia ki ktien khlemakor, kren tohmet ne kino kino ki jingleh tam ha katei kamiet?, ka CW3 kala jubab “Em, nga khlem iohsngew”.

“Ka CW1(Bindas Syiem) ha ka jingai sakhi kam shym la pynpaw eiei satia ba ka don ka jingpynkhein ia ka hok jong ka. Ka dei hadien ba cross examination ia ka, ka CW1 haba kylli ia kane ka jingkylli ‘Ha ka jingsngew jong phi, kaei ka hok jong phi ba nga lane ki Pulit kila iuhroit. Ka CW1 kala ai ia ka jubab “Ha ka jingsngew jong nga, nga sngew ba ka hok jong nga kala shah iuhroit namar ba ha katei ka sngi, phi la wan ha ka por shiteng miet sha katei jaka ryngkat bad ka Ambulance. Ngam shym la iohi ia ki doktor lane ki nos, balei ba ki Pulit kin wan ha ka por shiteng miet bad ka Ambulance” ong ka hukum.

Haba bishar ia ki sakhi la paw ba ki jingai sakhi ka CW1 (Bindas Syiem), CW2 Kyrmen Uriah bad CW3 (Purity Phawa) kim shym iahap satia bad kaei kaba jia. Ka Commission kala shem ba kine ki jingai sakhi ki dei ki bym iahap bad ki bym lah ban shaniah.

Ka Commission kala pynpaw ruh ba ki briew kiba iadonlang bad ka kong Bindas Syiem ha katei ka miet ba jia kane ka jingjia, kim shym la wan mih ban ai sakhi bad wat ia ki video clip jong ka jingjia ruh ym shym la ai satia ha ka jingbishar.

Ka Commission kala pymkut ba kam don satia ka jingpynkhein ia ka hok longbriew bala kynnoh leh da u Ravi bad kumta ia kane ka mukotduma la pynwai noh.