Shillong, Nailur 24 : Ka Myntri ka Koit ka Khiah Kong Ampareen Lyngdoh ha ka sngi Ba-ar, kala pyntip ba ka Sorkar kala rai ban pynkiew noh ia ka tulop jong ki nongtrei ka 108 Emergency bad pynkhreh ruh ban khot tender thymmai na ka bynta ban pyniaid ia ka 108 Emergency Services ha Jylla.
Ka Myntri kala iakynduh ia ki nongtrei ka 108 Emergency Services, kiba la pynpaw ia ka jingsngewwsuh ia ka jingpynkiew tulop ba dang shen jong ka Sorkar.
Nalor ka jingpynkiew tulop, ka Sorkar kala shimkhia ruh ia kiwei ki mat kiba iadei bad ka jingtreikam ki nongtrei, ka policy shim shuti bad ki jingmyntoi ban ai sha ki nongtrei ha ka liang ka koit ka khiah.
Ka Myntri ka pyntip ba ka Tnad kala don ha ka bynta kaba khatduh ban khot ia ka tender thymmai na ka bynta ban pyniaid ia ka 108 Emergency Services ha Jylla.
Kala pynpaw ia ka jingsngew skhem ba kiei kiba la mad ha ki snem bala leit noh, kila ai jinghikai kumno ban pynthikna ia ka jinglah pyniaid ryntih ia ki kam ha kane ka kynti ba mynta.
