Shillong, Risaw 30 : Ka Meghalaya State Electricity Regulatory Commission (MSERC), ba ialam da u Chairman ba thymmai Chandan Kuman Mondol, dang shen kala pynthymmai ia ka bai bording elektrik kaba pynrit ia ka bai bording jong ki Industrial High Tension (HT) haba pynkiew pat ia ka bai bording jong ki thliew Iing.
Haba kren halor kane ka kam, u Myntri ka tnad Bording AT Mondal ula ong “Ka bording ka dei kaba la buh da ka State Electricity Regulatory Commission. Ai ba ka hukum kan mih shuwa, hadien ngin sa shong bishar thymmai ia baroh kat kum ki jingdonkam. Kin don ki jingpynjynsur ia ki karkhana ban pynshlur ia ka jingkynshew kam hynrei ngin da bishar bniah shuwa ia kiei kiei baroh”.
Ha ka dor bording bala buh thymmai ka ba treikam naduh ka 28 tarik Risaw, ki longiing kila mad ia ka jingkiew ka bai bording bala buh beit shibnai (fixed charge) da T.90 shi kilowatt ha ka shibnai. Ka bai bording ia ki longiing la buh ha ka dor ba T.5.55 ha ka shi kilowatt na ka bynta ki 100 unit ba nyngkong bad T.5.65 ia ka 100 unit ba bud. Ka bai bording jong u snem 2023-24 hapoh u Chairman barim Peter W Ingti, la buh ia ka fixed charge ha ka dor ba T.80 shi kilowatt katba ka bai bording ia ka 100 unit ba nyngkong ka long T. 4 shi kilowatt.
Hynrei, ki karkhana kin iohnong bha na ka jingpynduna ia ka bai bording ha kane ka dor ba mynta ha kaba ka bai bording bala buh thik ha ka shibnai (fixed charge) ka long T.310 ha ka shikilowatt katba ka bai bording ka long T.6.51 shi kilowatt. Shuwa kane, ka bai bording ka long T.7.80 shi kilowatt ha u snem 2023-24.
Haba kylli ia ka jingpynkiew ia ka bai bording ki iing briew, u Myntri ula ong “Phi iohi, ha man ki jaka ka dor ka dei kaba ju pynthymmai jan manla u snem. Ka shong ha ka Regulatory Commission ba kumno ba khmih bad khein bad ngi ruh ngin sa shong bishar ia kane”.
Ka MSERC kala hukum ba kane ka dor thymmai ka dei ban paw ha ki bill jong baroh ki nongthang bording elektrik ka ban sdang treikam naduh u Nohprah 2024.
