Shillong, Risaw 30: Ka Rangdajied United FC ka la ïoh ïa ka jingjop kaba nyngkong ha ka OC Blue Shillong Premier League 2024 da kaba pynliem ïa ka Ryntih FC da 3-0 kol.
Hadien ka jingïakhun kaba khlem lah ban iathep kol haka kylla step, u Pasborlang Khonglikong (78’, 90’+3) bad u Manbhakupar Iawphniaw (88’) ki la lah ban pynjop iaka Rangdajied ban khur ïa ki points ba nyngkong ha kane ka lympung.
Lah ban kdew ba ka Ryntih kam pat ju pynliem ïa ka Rangdajied ha ka lympung SPL bad kane ka rekod bym sngewtynnad ka dang ïai bteng na ka bynta ka Ryntih.
Naduh ka SPL 2019, ka Rangdajied ka la jop san sien bad ïakhaid shisien pyrshah ia ka Ryntih, kynthup mynta ka sngi.
Ha ka 31 tarik ka kynhun ba ha trai duh ka Nongthymmai SC kan ïakhun pyrshah ïa ka Nongrim Hills SC ha ka por 5:30 janmiet.
