Guwahati, Lber 24 : U khlur ialehkai ka India, Sunil Chetri ula pynkhreh ialade ban rung ha ka thup sah kynmaw ha ka histori jong ka jingialehkai photbol da ka jingpynkhreh ban mih iakhun ia ka International match ba 150 sien ha ka 26 tarik Lber ha Guwahati.
Une u khlur ialehkai ka Ri India, un ialam ia ka kynhun ka Ri ban iakhun pyrshah ia ka Afghanistan ha ka jingialehkai FIFA World Cup 2026 bad ka AFC Asian Cup 2027 Premiminary Joint Qualification Round 2.
U Chetri uba la sdang ialehkai ha ka 12 tarik Jylliew 2005, ula wan hakhmat duh napdeng ki nongialehkai phutbol ka Ri India, da ka jingioh ia ka record haduh 93 kol ha ki 149 tyli ki jingiakhun, kaba buh ruh ia u ha ka kyrdan ba 4 kyllum lang bad ba lai napdeng ki nongialehkai kiba dang ialehkai ha ka pyrthei.
Ka All India Football Federation (AIFF) kala pynkreh ruh ban pynlong ia ka jingpyndon burom ia u Chetri ha Guwahati halor kane ka jingkynjoh jong u ia u mawmer bad long u nongai mynsiem ia ki million ngut hapdeng ki para nongialehkai phutbol ka Ri India.
