Shillong, Nohprah 08: U Myntri ka sorkar jylla bad MLA ka UDP na Khliehriat Bah Kyrmen Shylla hynne ka sngi Thohdieng, ula ong ba ha u snem ban wan, yn sa lum ia ka jingialang kaba heh, ban shim iaka jingpynpaw bad jingsngew jong ki paidbah ka East Jaintia Hills ha kaba iadei bad ka jingthmu jong ka sorkar jylla ban wanrah iaka lynti rel hapoh ka District.
Haba iakren bad ki nongthoh khubor, u Bah Kyrmen ula ong, ba ia kane ka rai la shim da u ryngkat bad ka MLA ka NPP na Sutnga-Saipung ka Kong Santa Mary Shylla hadien ba kila sngewkhia iaka jingmih jong ka sur kaba ia phiah jong ki paidbah hapoh ka District halor katei ka mat.
“Man ba ngi iakynduh ia ki kynhun bapher bapher, nga la shem ba ym baroh ki kyrshan iaka jingthmu ban wanrah ia ka el hapoh ka District bad ym baroh hi kiba pyrshah ia katei.
Kumta kaba bha tam ka long ban leh ka long ban lum ia ka jingialang kaba heh, khnang ba ki paidbah jong ka District kin ioh ban pynpaw bad ai iaki jingpynsngew ki jongki bad ia ki jingai jingmut halor katei ka kam. Ngi mpat buh ia ka tarik hynrei katei ka jingialang kan long ha u bnai Kyllalyngkot jong u snem ban wan” ong u Bah Kyrmen.
Ula ong ban rai halor katei ka kam kam long kaba dei ban shu leh kyrkieh noh.
“Ngin sa peit ia ka por kaba biang bha bad ban pyndonbynta lang ia baroh hi, da kaba pynlong iaka jingialang ban iatai sani bha halor katei ka mat” ula ong.
“Lada kiba bun hi ki pyrshah iaka rel, ngi ngin don lang bad ki paidbah bad lada kiba bun hi ki pdiang iaka rel, ngin don hi bad ki paidbah namar ba ngi dei ki nongthaw aiñ” ula ong.
Ula ong ruh, “Ba ki don ki briew kiba pyrshah iaka rel khlem da don pat ia ka nongrim ne ki daw kiba biang bad haba nga kylli pat ia kito kiba kyrshan balei ki kyrshan, ki ruh kim don iaka jingtip balei ki kyrshan ban wanrah iaka rel”.
Ula ong ba ka jingthmu ban lum ia ka jingialang ka long ban iatai sani ia ka jingmyntoi bad ia ka jingduhnong jong ka rel khnang ba ki paidbah kim ym pyrshah ne kyrshan matlah.
“Lada ngi kyrshan matlah bad lada ka ktah pat hadien ia ngi, ngin sa babe bad lada ngi pyrshah hynrei hadien kan long kaba bha, ngin sa babe. Ngam kwah ba ki briew jong ngi kin shim ia ka rai kaban ktah ia ki hadien habud bad ba kin babe. Kumta baroh kiba donbynta kidei ban mih ryntih lang bad ban shim ia ka rai la yn pdiang ne yn pyrshah iaka Rel” ong u Myntri Sorkar.
Halor ka jingkylli ba katto katne ki nongialam ka NPP, ki kyrshan ia ka jingthmu ban wanrah ia ka rel, na ka liang u Bah Kyrmen ula ong, ba ka jinglum ia katei ka jingialang kam dei naka bynta ban ioh jingmyntoi ha ka kam saiñ pyrthei ne politik ia ka UDP ne NPP.
“Ka jingsngewkhia ka jong ngi ka long la ki paidbah, la ki padiang ne kim pdiang. Kam don kano kano na ka bynta ka jingmyntoi ne burom jong ki seng saiñ pyrthei. Wat lada ki kren ia katei ruh, ngam tharai ba kin kren shaphang ka seng UDP ne NPP, kin kren beit kum ki nongthaw aiñ. Ngi don hangne na ka bynta ki paidbah ym tang naka bynta ka seng kaba ngi don” la pynkut u Bah Kyrmen.
