Shillong, Jylliew 09: U MP ka Congress na Tura Parliamentary Constituency u Saleng A Sangma, lashai ka sngi Nyngkong yn resaiñ noh kum u MLA ka Gambegre Constituency hadien ba ula shimti kum u MP ka Lok Sabha.
Katkum ki khubor kiba la iohlum la iathuh, ba u Saleng Sangma hadien ba ula jop ia ka elekshon MP ula leit sha Delhi ban pynbiang ia ki kot ki sla ban ioh long kum u MP ba pura bad kumta ha ka sngi nyngkong yn leit ban aiti noh iaka shithi ba ula resain noh kum u MLA ka Gambegre.
Ki tyllong khubor kila iathuh ba ki nongialam ka Congress kin leit synran ia u Saleng naka bynta ban leit aiti ia ka shithi resaiñ ha u Lamphang ka iingdorbar thawain ka jylla.
Kumban shu pynkynmaw ha ka elekshon MP na Tura, u Saleng A Sangma ula ioh haduh 383919 vote katba ka Agatha Sangma naka NPP kala ioh 228678 vote, u Zenith Sangma jong ka TMC ula ioh 48709 vote bad u Laben Ch Marak u kyrtong khlem seng ula ioh 6910 Vote bad u NOTA ula ioh 5840 Vote bad 703 tylli ki vote kila shah kyntait noh.
