Shillong, Rymphang 27: U MDC ka VPP na Laitkroh Lyngkyrdem Bah Shemborlang Rynjah ula pynkhreh ban shimti noh ia ka shuki CEM ka Khasi Hills Autonomous District Council hadien ba ki MDC kiba don ha ka Liang Pyrshah kim shym la thep kyrteng ban iakhun ia ka elekshon na ka bynta ka shuki CEM.
Kumjuh ruh u MDC ka VPP na Mawkhar-Pynthorumkhrah Bah Strong Pillar Kharjana ula pynkhreh ban shimti kum u Chairman ka KHADC khlem kano kano ka jingiakhun pyrshah.
Lah ban ong, ba ka VPP kaba don 17 ngut ki MDC, mynta ka pynkhreh ban ialam marwei ia ka Executive Committee ha KHADC.
U bah Shemborlang bad u Bah Strong Pillar kila thep kyrteng ban iakhun ia ka elekshon CEM bad Chairman tang mar syn kut ka jingpynbam smai ia baroh ki MDC thymmai hynne ka sngi.
“Hadien ba dep bishar ia baroh ki kot ki sla, la shem ba baroh ki dei kiba biang nadong hadong bad la pdiang ruh ia ki. Namar ba ym don ba mih ban iakhun pyrshah, kine ki arngut kila shah jied khlem ka jingiakhun pyrshah” ong u Secretary ka KHADC B Sohtun haba iakren bad ki nongthoh khubor.
Ka VPP kalarai ban thaw ia ka Executive Committee tang 8 ngut ki Dkhot kynthup u CEM khnang ban pynduna ia ka jing pynlut ksan jong ka Council.
Ka elekshon ban jied ia u CEM ba thymmai kan long lashai ka sngi por 2 baje janmiet hadien ka elekshon ban jied ia u Chairman ka ban long ha ka por 11 baje mynstep.
Ka VPP kala rai ruh ban pynieng ia u MDC ka Mawhati, Kynjohlang Rangtong kum u kyrtong ban iakhun iaka elekshon Deputy Chairman.
Ki MDC kiba la tyrwa ban shimti ia ka shuki Executive Member (EM) ki long :- Mawthadraishan MDC- Powell Sohkhlet, Nongthymmai MDC-Winston Tony Lyngdoh, Mawkyrwat MDC- Pynkhraw Kharjahrin, Mawkynrew MDC- Seiborlang Warbah, Umroi MDC-Isnei Hinge, Mylliem MDC- Aibandaplin L. Nonglait, bad Laitumkhrah-Malki MDC-Deiti Majaw.
