Shillong, Rymphang 27: Ki Deputy Commissioner ka East Khasi Hills bad West Jaintia Hills hynne ka sngi Palei kila pynbam smai ia ki 58 ngut ki MDC kiba la shah jied thymmai ban mihkhmat sha ka Iingdorbar ka Khasi Hills Autonomous District Council (KHADC) bad Jaintia Hills Autonomous District Council (JHADC).
Ka jingpynbam smai ia ki 29 ngut ki MDC ka KHADC la pyniaid da ka Deputy Commissioneer ka East Khasi Hills Kong RM Kurbah hapoh ka Iingdorbar ka Council.
Tang u CEM barim ka KHADC bad MDC ka United Democratic Party (UDP) na Sohra Bah Titosstarwell Chyne ula bam smai da ka ktien Khasi katba kiwei ki dkhot kila bam smai da ka ktien phareng.
Lai ngut ki MLA kynthup ia 2 ngut na ka UDP- Bah Synshar Roy Kupar Lyngdoh na Nongspung-Sohiong bad Bah Pius Marwein na langrin lem bad uwei u MDC ka NPP na Jirang Bah Sosthenes Sohtun, ruh kila bam smai kum ki MDC ba thymmai ka Council.
Haduh 4 ngut ki MDC kynthei kila don mynta hapoh KHADC ha kaba arngut ki dei na ka VPP– Deiti Majaw na Laitumkhrah-Malki bad Aibandaplin L Nonglait na Mylliem lem bad arngut na ka NPP – Grace Mary Kharpuri na Nongshken bad Rona Khymdeit na Nongpoh.
Baroh ki 17 ngut ki MDC ka VPP ki dei ki dur thymmai naba ki dei kiba dang shu shah jied ha ka sien ba nyngkong eh kum ki dkhot ka District Council.
U Deputy Commissioner ka West Jaintia Hills ruh ula pynbam smai ia ki 29 ngut ki MDC ka JHADC.
U CEM Bah Thombor Shiwat ha ryngkat bad 4 ngut ki CEM barim – Hambertus Nongtdu, Madonbai Rymbai, Andrew Shullai bad Moonlight Pariat kila pyndep ia ka jingbam smai.
Ka NPP ka don 14 ngut ki MDC ha KHADC, ka VPP ka don 8, Congress-3 bad Independent-1.
.){kind=link}