Shillong Rymphang 15: U Nongrwai ba pawnam ka Ri Bilat Colum Scott, uba la pawnam naduh ba u kiew ha ka rynsan Britain’s Got Talent 2015, un wan mynta sa ha Nongbah Shillong ban pynshoh jingieid ia ki paidbah da ki jingrwai kiba pawnam ha satlak ka pyrthei.
Une u Nongrwai uba pawnam naka jingrwai “Dancing on My Own” ha ka Audition jong ka BGT, un wan ban rwai ha ka concert ka ban long ha Lariti Auditorium, Mawkasiang (New Shillong) ha ka 20 tarik Lber.
Ki jingrwai kiba pawnam jong u Colum Scott ki kynthup ruh ia ka jingrwai “You Are the Reason” nalor ka jingrwai “If Our Love is Wrong” bad kiwei kiwei.
U Colum Scott uba la bna nam ha ka rukom rwai da ki sur sngewsynei bad ba syiang, ula shang kylleng ka pyrthei ban kiew ha kajuh ka rynsan bad u Ed Sheeran. Ka rai jong une u khlur nongrwai ban wan ha Shillong ka dei lyngba ki jingai jingmut kiba ula ioh na kiba bun ki para nongrwai kiba iathuh ia ka Jingieid Jingrwai jong kane ka Nongbah.
Ka Nongbah Shillong kala long ka magnet ba khring ia ki nongrwai ba pawnam ka pyrthei ba kynthup ia u Ronan Keating uba la wan ha u snem bala lah. U Ronan uba la shoh jingieid ia ka jingieid jingrwai jong ki nong Shillong, ula iaroh bha ia ka Nongbah, kaba synniang sha ka nam kum ka jaka ba hap leit pynlong concert jong ki nongrwai ba pawnam.
Ka concert ban wan jong u Colum Scott ha Shillong kan dei kawei pat ka lynnong ha ka jingiaid lynti jong ka Nongbah ban long ka jaka pdeng jong ka put ka tem ki nongrwai bad ki kynhun ka pyrthei.
Ka Lariti Auditorium, kaba don jaka shong kumba 1400, kan pynlong ha ka sien ba nyngkong eh ia ka International Concert, kaban pynthikna ia ka janmiet ka bym klet shuh ia ki nongleit concert.
Ia ka ticket jong ka concert u Colum Scott lah ban thied naduh ka sngi Saitjain ka 17 tarik Rymphang tang na karockskitickets.com.
