Shillong, Naitung 29 : Ka Sorkar Jylla kala pynkhreh shaid shaid ban pynkylla noh kum ka jaka iaid kjat ki paidbah ha Khyndailad-kawei na ki jaka khaii ba thnem bha ha Shillong-hadien ka jinglah ban pynkynriah ia ki nongshong dukan madan sha ka MUDA parking lot.
Haba pynbna ia kane hadien ka jingialang bala pynlong bad u Symbud Myntri Rangbah ka Tnad Urban Affairs Bah Sniawbhalang Dhar ha ka sngi Ba-ar, u Myntri kam Jngohkai Bah Paul Lyngdoh ula ong ba ka Sorkar Jylla kala rai ban pyniaid shakhmat ha kaban pynkylla jaka iaid kjat ki paidbah ha ka thain Khyndailad.
“Kaba kham kongsan ka long ba ngi la rai ba ka jingpynkylla jaka iaid kjat kan sdang noh mar mar bad ka pork an long naduh 7 baje mynstep haduh 9 baje mynmiet bad kan ym don satia kano kano ka jingiaid kali (naduh ka lad ban rung sha Khyndailad haduh Umsohsun) lait noh tang ki kali kiba la ioh ia ki pass ki ban ai tang sha kito kiba leit buh skul ia ki khynnah ha ka por long skul. Hynrei ha ki sngi shuthi, yn ym shah shuh ban iaid kali lait noh tang ha ki khep kiba kyrkieh ne ki jingjia ki bym lah ban batai lypa kum ka jingpluh ding bad ka pang ka shitom” ula ong haba iakren bad ki nongthoh khubor.
Ka Shillong Municipal Board kan sa ai shen ia ki pass sha ki nongshongshnong jong ka thain, ka ban shah ia ki ba kin leit ki wan shala iing ha ki kynta ba buh tang ban iaid kjat ki paidbah.
“Halor kane, ngi la pynkhamti ha ka SMB ia ka kamram ban lum ia ki jingtip ia ki briew kiba sah ha kane ka lynti iaid (Khyndailad-Umsohsun) khnang ban gin lah ban ai sha ki ia ki pass jong ki kali. Kane kan long tang ia ki briew ba sah ha ka thain ym ia ki briew kiba na shabar ka Khyndailad hynrei kiba bun dukan ha ka thain” ong u Bah Paul.
U Myntri ula pynpaw ruh ba ka Sorkar ka kmen palat ba ka Iingkashari Meghalaya High Court kala pynpaw ia ka jingsngewhun halor ka rukom pyniaid ka Sorkar Jylla haba iadei bad ka jingpynkynriah ia ki dukan madan bad pynthikna ia ka jaka kaba heh bad kylluid ia baroh ki nongpyndonkam ia ki surok bad khamtam ki nongiaid kjat ha kane ka jaka iew ba thnem eh ka sor.
Haba kren ia kiwei pat ki jingthmu, u Bah Paul ula iathuh ba ka Sorkar kala dep ban mang ban pyntrei ia ka kam ha ka ban shna ia 15 tylli ki painkhana (washroom) hakhrum jong ka MUDA Complex ka ban sa sdang noh mardor nalor ka jingpynbiang ia ka umdih.
Ula pynbna ruh ba u Symbud Myntri Rangbah bad ma u, kin sa aiti dalade ia ki cheque ba T.10,000 sha man ki nongshongdukan madan ha ka 5 tarik Nailar.
Haba kylli, u Bah Paul u iathuh ba ka jingjop ban pynkynriah ia ki nongshong dukan madan ha Khyndailad, yn sa leh lang ruh kumjuh ha kiwei pat ki jaka ba khapngiah ka sor Shillong kynthup ha Laitumkhrah bad Civil Hospital point/
