Shillong, Nailar 03: Ki arngut ki MLA ka Hill State Peoples Democratic Party (HSPDP) kila pynkhreh mynta ban mih noh na kane ka seng riewlum ban iakhun ia ka elekshon MLA 2023 na kiwei pat ki seng sain pyrthei ba don ha Jylla.
Kine ki arngut ki MLA ki dei u Myntri ka Tnad PHE Bah Renikton Lyngdoh Tongkhar jong ka Mawkyrwat Constituency bad u Myntri barim ka PHE Bah Samlin Malngiang jong ka Sohiong Constituency.
Ki jingiakren kila iaid ba u Bah Renikton u lah ban iasoh noh sha ka United Democratic Party (UDP) katba u Bad Samlin u dang iakhun ban ioh ia ka ticket jong ka National Peoples Party (NPP) bad u Myntri kam pohiing barim ka Jylla Bah HDR Lyngdoh uba la dep pyniasoh la katto katne bnai sha ka NPP.
U Bah Panborlang L Ryntathiang, General Secretary ka HSPDP ula pynthikna ba kine ki jingiakren halor u Bah Renikton ka dei kaba shisha katba ia ka jong u Bah Samlin pat ym pat shym la lah satia ban pynthikna namar ka party kam pat iakynduh satia ia kine ki arngut ki MLA ban iakren ia ka lynti jong ki sha ka elekshon 2023.
“Ngi la dep pynbna ia u kyrtong ka HSPDP Bah Medalsing Lyngdoh Tongkhar sha ka elekshon ban wan na Mawkyrwat Constituency. Hynrei ia ka Sohiong hi haduh mynta ngi dang ap ia ka por ba u senior Vice President Bah Martle Mukhion un iakren bad u Bah Samlin” ula ong.,
