Shillong, Nailar 3 : Ka National Peoples Youth Front (NPYF) hynne ka sngi ka la pynksan ba kam dei satia ka Trinamool Congress kaba rah nyngkong ia ka jingdawa pynrung noh ia ka ktien Khasi bad Garo ha ka khyrnit ba phra jong ka Riti Synshar ka Ri hynrei jan baroh ki party ki la don bynta lang ha kane ka jingdawa.
“Ngi kwah ban ai ka burom ia baroh ki MP ka jylla khamtam ki MP jong ka Party (NPP) kynthup ia Agatha Sangma MP Lok Sabha na Tura bad u Dr. WR Kharlukhi MP Rajya Sabha kiba la rah nyngkong ia kane ka jingdawa halor ka ktien Khasi bad Garo ha Parliament, ” ong u nongaiktien ka NPYF Bah Bajop Pyngrope haba kren bad ki lad pathai khubor.
Une u MDC ula ong ba ka long kaba sngew thamula ban iohi mynta ba ki Nongialam ka AITC kila kam ba dei ka jingiakhih jong ki MLA bad MP ka Party ha Delhi kaba pynrung ia ka mat iatai halor ka Ktien Khasi bad Garo ha Parliament.
“Kidei ban tip ba kane kam dei kaba la rah tang da ka AITC bad ba ki la thaw history hynrei nga ong ba ki leh politik” ong u Bah Bajop
Na ka liang utei u nongialam ka NPYF u ai ka burom ruh ia baroh ki ba la maitphang ia katei ka jingdawa khamtam eh ia ka Khasi Authors Society bad baroh kiba don bynta lang ha ka jingdawa naduh kaba sdang.
