Nongstoiñ, Rymphang 27: Kumba ka Election Commission of India ka la pynkhreh kyrpang da ki dara kiba itynnad ha ki polling station kiba hap ha ki model village.
Ha West Khasi Hills, ka Rambrai Jyrngam Assembly constituency, kala ithuh ia ka shnong Nonglang ka model village bad ha kane ka election ba mynta ka sorkar ka la pynkhreh kyrpang ban pynitynnad bad ban pynphuh pynphieng ïa ka jaka thep vote kaba dei ha ka Nonglang Secondary School building.
Ha ka jingleit jurip ïa ka jinglong jingman jong katei ka thaiñ mynta ka sngi, la lap ba ka jingthep vote ka ïaid beit ïaid ryntih bha bad ki paitbah ruh ki ïa mih ryntih ban thep ïa ki vote jong ki.
Hynrei ki paidbah nongthep vote hangne kim shym la ioh ban sdang ia ka jingthep vote ha ka pork aba biang namar ka jing thut ha ki mashin EVM.
Ki don katto katne tylli ki polling station kiba la hap ban sdang dier por ban thep vote kum ha Langja, Kyrdum bad Langpih, namar ka jingthut jong ki mashin. Wat la katta ruh ki paitbah nongthep vote ki lah ban ïaishah haduh ban da lah ban pynbeit.
