Nongstoiñ, Rymphang 27: Ka long ka khubor ba kham phylla lehse, hynrei ka dei pat kaba shisha ba uwei u rangbah u ba la tip kyrteng kum u bah Marcus Kharbani na ka shnong Mawbyrngem, kaba hap ha ka 34 Mawshynrut Assembly Constituency, ha ka sngi saitjaiñ ba la dep ka 25 tarik u la hap na ka ïing ar mala shapoh bad u syngkai u la shitom jur.
La ong ba kiba haïing hasem ki la pynkit noh mar mar ia u sha ka shnong Mawroh kaba don shaneng ka shnong Markasa, ban phah sop dawai kynbat bad u la hap ban sah ha katei ka jaka ba u shah sumar.
Hynrei, namar ba mynta ka lah sngi u Blei ka dei ka sngi thep vote, utei u rangbah um shah satia ba un duh thep ïa ka vote jong u bad ula kyntu ia kiba haïing hasem ban leit shaw na katei ka jaka sumar da ka kali ba un pyndep iala ka hok ban jiede ia ki Nongmihkhmat.
Haba poi ha polling station, ki rangbah ki la ïarap ban pynrah ïa u haduh ka jaka thep vote.
Ki rangbah na katei ka shnong haba ïakren bad u nongthoh khubor ha katei ka jaka, ki la ong ba hadien ba u la dep ban thep ïa ka vote jong u la pynkit biang ïa u sha ka jaka sumar bad wat hapdeng ka jingshitom, pynban u la hun ka mynsiem ba u la pyndep ïa la ka kamram.
Lah ban kdew hangne ba ki shnong kiba hap ha katei ka polling station Mawbyrngem ki don lai tylli ki shnong, kata ka Mawbyrngem, ka Rwiang bad ka Tiniang bad ki nongthep vote baroh ki don 395 ngut bad mynta ka sngi kiba wan thep vote ki don kumba 387 ngut.
