Shillong, Nailar 30 : U Symbud Myntri Rangbah ba khmih ia ka kam Pohiing (Police) Bah Prestone Tynsong ha ka sngi Thohdieng, u pyntip ba ki Pulit kila pyndep ia ka jingtohkit halor ka jingkynnoh thombor jong ki shipai BSF ia ka Longiing ha Kuliang, East Jaintia Hills District.
“Ka jingtohkit kala dep bad kala sah satang ban shu chargesheet” ong u Bah Prestone haba jubab ia ka call attention notice bala wanrah da u MLA ka VPP na Mawlai Bah Brightstarwell Marbaniang hapoh ka Iingdorbar.
U pyntip ba hadien kane ka jingjia, ki Pulit kila register ia ka case ha Khliehriat Women Police Station hapoh ka kyndon 457,236,354,384 bad 34 jong ka Indian Penal Code, ba pule lang bad ka kynhun 7 bad 8 jongka POCSO Act.
U iathuh ba ha kane ka juh ka sngi jong ka 20 tarik Jylliew, 2024, la tohkit ruh ia ki nongujor bad ki lanot bad la shim jingthoh ia ki jingbatai jong ki, bad la shim ruh ia baroh ki sienjam ba donkam kum ka jingleh medical test, ka jingleit jngoh ia ka jaka ba jaka bad ka jinglum ia ki sakhi satar kat kum ka lynti jong ka ain.
Ha ka 20 tarik Jylliew, ka kong Martina Pohshna na Kuliang, kala ujor ejahar sha ki Pulit ba pyntip ba ha ka miet 19 tarik, kumba 11:30 baje eiei, lai ngut ki briew kiba kam ialade kum ki shipai BSF kila wan rung jubor hapoh ka Iingsah jong ka.
Kine ki briew kila rah da ki tiar pynmynsaw kynthup ka suloi bad ka wait bad ki dei kiba phong jain iing.
Kila rung jubor hapoh ka Iing ba hadien bala rung, kila shon dusmon ia u Kpa ka Iing Ban Shanroi Lyngdoh bad kila shim ruh ia u sdie napoh ka Iing bad pyrshang ban pyndonkam ha kaban leh eiei pyrshah ia kane ka longiing.
Wat hapdeng ka jingpyrshang jong ka kong Martina Pohshna bad ka Khun ba dang 15 snem ban knieh ia ki tiar na kine ki briew, hynrei kila shah thombor kylla pynban. Kine ki breiw kila iai bteng ban shoh ia u Bah Shanroi haduh ba la kdiah ka shyieng krung.
Hadien kane, ha ka por 12:30 mynstep, kine ki juh ki briew kila wan phai biang ha ryngkat bad palat 15 ngut ki briew bad kila bteng biang ban shoh dusmon ia u Bah Shanroi Lyngdoh.
Ha kane ka jingthombor, kila knieh jubor ia ka phone jong ka khun jong kane ka nongmudui ba dang 15 snem bad kila jrong kti sa ia ka.
Haba ka kong Martina kala pyrshang ban iada iala ka jong ka khun, kine ki briew kila ktah kti lang syndon sa ia ka. Kine ki nongthombor kila byrngem ban siat ia kane ka longiing bad byrngem ruh ba kin husiar hadien habud.
