Shillong, Nohprah 11 : Ka Tnad Education kala pynkhreh ia ka blueprint ba kumno kan shim ia ka sienjam ha kaban lah pynbeit noh ia ki jingeh jong ki nonghikai SSA.
“Ka Tnad Education ka dang pynkhreh ia ka blueprint ba pura bad ynsa wanrah ia ka sha ka Sorkar Jylla ha ka 9 tarik lane 10 tarik Kyllalyngkot, 2025 “ ong u Myntri ka tnad Pule Puthi Rakkam A Sangma haba iakren bad ki lad pathai khubor.
Lah ban kdew hangne ba ka Meghalaya SSA Schools Association (MSSASA) kala dawa ia ka Sorkar ban wanrah da ka policy ka ban ai jingshngain ia ka jingshakri jong palat 13000 ngut ki nonghikai SSA katba ka All Meghalaya SSA School Teachers Association (AMSSASTA) kala dawa ban pynkiew da ka tulop.
Haba pynpaw ba ka Sorkar kala kut jingmut hok banpynbeit ia ki jingeh jong ki nonghikai, u Rakkam ula ong “Ka jingpyn khreh ia ka blueprint ka dang iaid. Hooid ka dei ka jingtynjuh, hynrei, ka lynti ka don beit haba don ka mon. Ka Sorkar ka don ia ka mon bad khlem pep ngin sa shem ia ka lynti”.
Haba kylli, u Myntri ula ong “Ka Tnad ka tip ia ki jingtynjuh bad ki jingeh bala mad da ki nonghikai hynrei ki don ruh shibun ki jingeh hangne hangtai kaba ngi hap ban wanrah sha ka jingtip jong ka Sorkar ba kumno ngin leh”.
“Ngin sa rah sha ka Sorkar ia ka blueprint. Ngim tip la kan mynjur ne em hynrei ngi la pyndep ia ka kam ba kumno ban wad ia ka lynti kaba biang eh ban pynbeit shisien pynbeit ia kane ka kam” ula ong.
