Shillong, Lber 24 : Ka Sorkar Jylla kala sdang pynkhreh ban shna la ka jong ka electoral roll na ka bynta ka Garo Hills Autonomous District Council (GHADC) hadien ba u Lat ka Jylla CH Vijayashankar ula ai jingmynjur ia ka amendment ba khang ia ki bar jylla ban iakhun ia ka elekshon ka Council.
U Symbud Myntri Rangbah ba khmih ia ka Tnad District Council Affairs (DCA) Bah Prestone Tynsong ula pynthikna ha ka sngi Ba-ar ba ka Sorkar kan sa thoh sha ka Khasi Hills bad Jaintia Hills Autonomous District council, ba kyntu ia ki ba kin pynkylla noh iala ki jongki Rules.
Haba iakren bad ki nongthoh khubor, u Bah Prestone ulaong ba ka Sorkar ka lah ban weng noh ia ka rai pynjlan ia ka samoi treikam ka GHADC ba hynriew bnai watla u Lat ula ai jingmynjur.
“Em, ai ba ngan batai sha phi…ngi sngewnguh ia u Lat uba la ai jingmynjur ia ka amendment bala mynjur da ka GHADC ba iadei bad ka Rule 8 ha kaba la bujli ia ka kyntien “Tang ki Scheduled Tribe”. Mynta ka sngi u Lat ula ai jingmynjur ia ka bad mynta ka amendment kala treikam” ula ong.
Ula batai ka kam kaba dei ban leh mynta ka long ban khmih bniah biang ia ka kyrteng ki nongthep vote.
“Ngi hap ban khmih bniah biang ia ka electoral roll. Lashai, ngan sa lum ia ka jingialang ban iakren bniah bad ngan sa ai jingbthah ba donkam sha ka GHADC” bynrap u Bah Prestone.
Haba kylli la ka donkam ka electoral roll la ka jong, ula jubab “Hooid, ka electoral roll la ka jong ka long kaba donkam ia ka GHADC. Ka long kaba donkam namar ha Khasi bad Jaintia District Council, ngi don ia ka electoral roll tang jong ki riewlum. Mynta da kane ka amendment, ngi hap ban pyntreikam ia ka kum leh ha Khasi bad Jaintia”.
U Bah Prestone ula ong ba ka Sorkar kan sa phah da ka jingthoh sha ka KHADC bad JHADC ba kan mynjur lem ia kum kane ka kyndon.
“Shen ngin sa thoh shithi na ka Sorkar sha ka KHADC bad JHADC ba ki dei ban pynkylla ia kajuh ka clause 8 jong ka AD Rules bad phah sha u Lat ba un ai jingmynjur” ula ong.
 hadien ba u Lat ka Jylla CH Vijayashankar ula ai jingmynjur ia ka amendment ba khang ia ki bar jylla ban iakhun ia ka elekshon ka Council.){kind=link}