Shillong, K’lyngkot 16 : Ka Sorkar Jylla kala ai jingmynjur ban pynrung ia ka Community Integrated Skill Learning kum ka curriculum bala pynbeit ryntih na ka bynta ki klas VI haduh X.
Haba pynbna ia kane ha ka sngi Thohdieng, u Myntri Rangbah Conrad K Sangma ula ong “Ka Kynhun Myntri kala ai ka jingmynjur ia ka jingtyrwa ban pynrung ia ka Community Integrated Skill Learning kum ka curriculum bala pynbeit ryntih na ka bynta ki klas VI haduh X”.
Kane ka sienjam ka thmu ban pynrung lang ia ka sap ka phong ki khynnah ha ka Physical and Health Education Curriculum, ha kaba 50% ka marks yn ai sha ki khynnah skul kiba shim ia kano kano ki sap na ki bahaiing hasem ne ki shnong ki thaw.
“Ngi thmu ban buh 50% ka mark ia ki khynnah suk kiba iashimbynta ha kata ka sobjek…..ha kaba yn bthah ia ki khynnah skul ban hikai lang ia kawei ka sap ne bun ki sap kaba ki kwah ban leh” batai u Conrad.
Kane ka sap ka lah ban don jingiadei bad ka kam khaii pateng ne ka trei ka ktah ki bahaiing hasem, kum ka jingshet jingbam, ka rep jingrep, lane ka kam shoh nar, kaban ailad ia ki khynnah skul ba kin shim ia ki jinghikai na ki kmie kpa ne ki bahaiing hasem.
Kane ka sienjamm kan don bun ki jingmyntoi, kynthup ka jingpynlah ia ki khynnah skul ban don ia ka sap ka ban don jing mih, pynshlur ban pynbteng ia ki kam ba trei ba ktah ki bahaiing hasem bad kiweikiwei.
U Myntri Rangbah ula ban jur ba kane ka sienjamm kan pynshlur ia ki khynnah skul ba kin iakren iakhana bad ki kmie kpa bad ban shim ia ki jinghikai ha ki sap kiba kynsai, haba ioh marks ruh ha ki jingpule jong ki.
