Shillong, Jymmang 10 : Ka Sorkar Jylla kala pynkhreh ia ki sienjam ba donkam ban shim ban tem ia ki jingpynjulor jong ka lyiur bad kala bhah lypa ia ka song pisa ba mar T.20 klur sha baroh ki Deputy Commissioner ba kin kloi ai jingiarap ia ki lanot kiba shah ktah ha ki jingjia shlei um bad twa khyndew.
U Commissioner & Secretary ba khmih ia ka Tnad Revenue & Disaster Management Sanjay Goyal ha ka sngi thohdieng, ula lum ia ka jingialang bishar kam halor ka jingpynkhreh jong ka Jylla ia ka jingwan jong ka lyiur.
“Ka sngi kaba la buh ia ka jingwan iuhkjat ka lyiur hapoh ka Jylla ka dei ka taiew ba nyngkong u Jylliew. Ngi la pynkhreh bha haba iadei bad ka jingwan jong ka lyiur” ong u Goyal haba iakren bad ki lad pathai khubor hadien ka jingialang jong ka State Level Coordination Committee (SLCC).
La wan iashimbynta ha kane ka jingialang da ki Heh Ophisar bapher bapher kynthup na ka Tnad ka Koit ka Khiah, ka PWD, PHE, SDRF, Civil Defence, IMD, Education nalor ki Deputy Commissioner kiba dei khmih ia ki lad ai jingiarap hala ki jong ki District.
“Ka mat ba hakhmat eh bala iakren ka long ba haduh katno ngi la pynkhreh haba phai sha ki lad ai jingiarap ba kyrkieh. Baroh ki Deputy Commission kila pynong ia ki jingialang jong ki District Level Coordination Committee ha kaba kin sa pynbiang lut nadong hadong lada mih kino kino ki jingjia ne jingpynjulor. La bthah ia ki ba kin lum jingkhein ia ki jaka ba don jingma, ia kaba kila leh” ong u Goyal.
Haba pynpaw ba ki District Level Disaster Management Plan la ai jingbatai da ki Deputy Commissioner, ula ong ba kine ki kynthup ia ka resource mapping, kiei ki jingdonkam ba lah ban ioh haba phai sha ki tiar bad kiwei kiwei.
“Ka thup jong ki nodal officer kumba phi tip namar ka elekshon, kila mih ki jingkylla ha ki kyrdan bapher bapher namar ka jingpynkynriah ia ki Ophisar. Kumta la bthah ia ki ba kin ai jingtip biang ia ka thup ki Nodal Department ha ryngkat ban ai ia ki nombor phone khnang ba kan iaid beit ka jingiasam jingtip ha baroh ki kyrdan” ula bynrap.
U Goyal u pyntip ba ki Incident Response System ruh kila treikam biang ha kane ka por na ka bynta kano kano ka kam ba kyrkieh.
Haba phai sha ki lad ai jingiarap, u Goyal u pyntip ba jan kumba T.20 klur ka pisa la buh bad ki Deputy Commissioner ba kin pyniaid kam haba don kano kano ka jingjia.
“Nga kwah ban bynrap ia kawei ka kam kumba la shong bishar kam da u Myntri Rangbah, ngi la shem ba ki don katto katne ki jingeh haba phai sha ka jingpyllait iaka pisa sha ki nongioh jingmyntoi ha ka por ba lyngkot bad mynta ngi la weng ia kane ka jingeh da ka jingaibor shuh shuh ia ki Deputy Commissioner” ula ong.
“Nga sngewkmen ban pyntip sha phi ba ha kine ki jingjia lynshop eriong ba dang shu dep, ngi la lah ban phah ia ka pisa sha ka account jong ki lanot tang hapoh 24 haduh 48kynta, kaba la iarap bha ia ki paidah bad ngi la lah ruh ban leit ai jingiarap bam ardor haba iadei bad ka jingmaramot ia ki iing bad kiwei kiwei ki jingiarap kiba long kat kum ki kyndon bala buh da ka Sorkar India” ula bynrap.
Ha kajuh ka por, 7 ngut ki briew kila iap bad palat 2800 tylli ki Longiing kila shah ktah na ka jingther jong u slap hapoh ka Jylla.
