Shillong, Nailar 29 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ha ka sngi Palei, ulapyntip ba kila don haduh 4 tylli ki project surok kiba la pynkhreh ban pyntrei hapoh ka Mawphlang constituency.
Haba jubab ia ka jingkylli bala wanrah da u MLA ka Mawphlang Matthew B Kurbah ha Iingdorbar Thaw Ain, u Bah Prestone ula ong ba na kine, artylli ki project ki dei na ka PMGSY bad artylli ki dei na ka skhim ka Jylla.
Kine ki dei : Thain Thynroh sha Umsawmat sha Lyngdoh Phanblang bad sha Mawngap Mawkharshiing (PMGSY-III), ka jingshna pynbha ia ka surok Mawphlang Cart Road bad suro Mawphlang Balat (Wah Umpamtiah sha Weilei) nalor ka jingshna pynbha bad shna ia ka surok ban leit sha Law Kyntang (Sacred Groves) Mawphlang.
Ka mang pisa jong ka Sorkar India bad ka Sorkar Jylla yn sa pyllait ha kane ka snem mang tyngka jong une u snem 2024-25, ula bynrap.
U Bah Kurbah ula pynpaw ia ka jingsngeewkhia halor ka jingsniew ki surok ha ki shnong nongkyndong kaba la ktah ia ki nongrep namar ka jingbym lah ban pynpoi iala ki mar sha ki iew. Ula ai jingmut ia ka Sorkar ban wad song pisa ha kaban shna ia ka surok sha nongkyndong.
Haba u MLA ula pynpaw ruh ia ka jingkwah ban tip la ka Tnad ka don jingthmu ban pynheh ia ka surok namar ka jingkhapngiah ka surok ha Mawngap, u Bah Prestone ulaong ba ka Tnad kala dep rai ban pynkylla ia ka surok Mawngap-Mawphlang haduh Weilei kum ka surok Intermediate.
“Hynrei, ka jingkylli hangne ka long la ngin ioh jaka ne em namar haba phai sha ka State Scheme, kam don sati aka kyndon ban siew bai jaka. Ka jingeh jong ka PWD ka dei ki trai jaka haba ngi kwah ban pynheh ia ka surok” ula ong.
