Shillong, Nailur 20 : U Myntri Rangbah ka Jylla Conrad K Sangma ha ka sngi Balang, ula pyntip ba ka Sorkar ka dang shong bishar mynta iaka rukom thungkam thungjam hapoh ka Jylla bad pynkhreh ban wanrah noh da ka Policy ka ban wanrah ia ki jingkylla ha kane ka kam.
“Ngi la shong bishar ia baroh ki rukom thungkam thungjam. Kumta, ngi la shim rai ba lada ngi dei ban wanrah jingkylla, ai ba ngin leh shisien leh shisyndon bad ban khmih ha baroh ki liang bad ban wanrah da ka Policy bad ka plan kaba bniah” ong u Conrad haba jubab hapoh ka Iingdorbar.
Kane kala mih hadien ba u MLA ka UDP na Mookaiaw Nujorki Sungoh ula kyrpad ia ka Sorkar Jylla ban shong bishar ia ka jingdonkam ban pynduh noh ia ki personal interview khnang ban pynthikna ia ka jingthungkam kaba khuid bad ba shai.
Ula ai nuksa ba ka Sorkar Pdeng kala dep ban pynduh ia ki personal interview naduh u snem 2016 ha kaba haduh 23 tylli ki Jylla bad 8 tylli ki Union Territories kila pyntreikam lang ia kane ka rai.
“Namar kata, nga kyrpad ia u Myntri Rangbah ban sngewbha bishar lang ia kane ka kam bad ban pynthikna ba ka Jylla jong ngi ruh kan pynduh noh ia ki personal interview, ka ban pynthikna ba kan nym don ka jingjied briew (favouritism) ne thungkam tang ia ki bahaiing ne paralok (nepotism)” ong u Bah Sungoh.
Halor kane, u Conrad ula ong ba u Myntri Rangbah barim ha u snem 2017 ula dep thoh sha ka Sorkar India ba pyntip ba ka Sorkar Jylla kan ym pynduh satia ia ka personal interview.
“Hynrei, ngi la shong bishar mynta ia ka kam. Ki don ki jingmyntoi bad jingduhnong ha kane. Ta ka daw ka Sorkar ka dang bishar ia baroh ki liang bad ban pynthikna ba kano kano ka rai ban shim kan long na ka bynta ka jingbha jong baroh bad ruh ban pynthikna ba ki rukom thungkam kin long kiba janai bad ban plie lynti bha ia ki samla ka Jylla” ula bynrap.
U Conrad ula pyntip ruh ba u Myntri Rangbah barim ha ka shithi bala phah ha u 2017, ula kdew ia ka jingdon jong ki briew ba bat ia ka kyrdan pule bapher bapher (kiba aplai kam bapher bapher) bad kumta ka interbiew kan ailad ia ka selection committee ban sngewthuh ia ka jingtbit bad lah pyniapher ruh hapdeng ki nongaplai kam bad ban peit mano ba kham bha ban shimti ia ka kam.
“Baroh kine ki kam kumba nga ong ba ngi donkam ban khmih bha. Kam dei ka rai kaba rit, ka dei ka rai kaban ktah ia ki samla, ngi hap ban husiar bha, ngi hap ban bishar bin pa bin” ula ong.
U Myntri Rangbah ula ban jur ia ka jingdonkam ban don ia ka policy kaba khlain ban lah wanrah ia ki jingkylla ha ka rukom thungkam thungjam hapoh ka Jylla.
