Pynkhreh ka Sorkar da ka MegSIMS portal ban phah ia ki jingtyrwa tulop, ong u Myntri

Shillong, Rymphang 17: U Myntri ka Pule puthi Bah Lahkmen Rymbui hynne ka sngi Baar ula ong ba ka Sorkar kala pyniaid ia ki jingtyrwa siew tulop lyngba ka portal kaba khot Meghalaya School Information Management System (MegSIMS), ka ban pynduhjait ia ka jingpynslem da kaba phah ia ki jingtyrwa lyngba ki kot ki sla.

Haba jubab ia ka jingkylli na u MLA ka TMC u Dr Mizanur Kazi, u Bah Rymbui ula ong, ba kam don ka jingslem ban siew ia ka tulop jong ki nonghikai sorkar hynrei kala don ka jingslem ha kiwei pat ki kyrdan jong ki nonghikai.

“Ngi lah dep siew ia ka tulop ki nonghikai haduh u Nohprah 2025,” ula bynrap.

Ula pynpaw ba kila don ki daw jongka jingpyniaid ia ki kam ki jam jong ka tulop bad ka sorkar kala wanrah ia ka rukom treikam kaba thymmai ban pynkloi ia ka jingbhah.

Halor ka jingkylli, la ka tulop jongki nonghikai Adhoc bad ki nonghikai kiba ioh ia ka Grant-in-aid la phah noh shawei, u Bah Rymbui ula kyntait da kaba ong,
“Em, sir, kam don kano kano jingphah shawei ia ka tulop. Ka tulop kaba dei jong ki nonghikai ka leit beit sha ki nonghikai”.

U Myntri ula pynthikna ba ka kynhun myntri kala mynjur ia ka rukom pynwandur ia ka tulop nonghikai. “Ka jingeh jong ki nonghikai kadei kawei na ki mat kaba heh. Nga ai khublei ia u Myntri Rangbah bad ia ka Kynhun Myntri kaba la ai jingmynjur ia baroh ki kyrdan nonghikai kiba ioh ia ka grant-in-aid da kaba wanrah ia ki hapoh jong kawei ka tnum” ula ong. Kane ka rukom pynwandur thymmai ia ka tulop kan treikam naduh ka 1 tarik u Iaiong 2026.

U Bah Rymbui ula bynrap ba la phiah la ka jong ne ka Separate Budget Heads na ka bynta ka tulop bad ka rukom pynwandur thymmai ia ka tulop kadei da ka jingthmu pynbeit ia ka jingbym iaid ryntih kaba la bun snem.

“Tang kawei ka mat ka long ba mynta la bun phew snem ka jingpynslem ka lah don. Ban pynbeit ia baroh kine, ka sorkar kala pynmih da ka rukom treikam kaba thymmai ban pynsuk ia ka jingmut jingpyrkhat ki nonghikai khnang ba kin ioh ia ka tulop ha ka por kaba biang,” ula ong.

U Nongialam ka Liang Pyrshah u Dr. Mukul Sangma ula pynpaw ba kala don ka jingiapher hapdeng ki kyrdan. “Ngi donkam ban shimkhia ia kane ka jingiapher kaba jur bha bad ban ai ia ka hok ia kum kitei ki nonghikai” ula ong.

Haba pynshai halor kane, u Bah Rymbui ula ong ba ka sorkar kala pynmih ia ka Notification ha ka 12 tarik u Rymphang ban kyntiew ia ka tulop ki nonghikai. “Ngi lah ithuh ia ka jingnoh synniang ki nonghikai. Nga sngewnguh ia u Myntri Rangbah ban wanrah ia ka jingbiang ha ka rukom siew. Ngi lah pynmih ia katei ka Notification, kan treikam naduh ka 1 tarik u Ìaiong 2026 kan pynduna ia ka jjngeh jong ki nonghikai” ula ong.