Shillong, Naitung 16: Ka tnat Animal Husbandry and Veterinary ka Sorkar Meghalaya kala ioh jingmynjur lane ka No Objection Certificate ban tei iaka Quarantine Health Check Gate ha Ribhoi District.
Ia kane la pyntip da u president ka All Meghalaya Poultry Farmers Association (AMPFA) Bah Daminot Sylliang hadien ka jingiakynduh ia u Myntri ka tnat Animal Husbandry u Bah AL Hek.
Haba kren sha ki lad pathai khubor, u Bah Daminot ula iathuh ba kat kum ka jingiakren bad u Myntri, iaka Health Check Gate yn tei ha Toll Gate 20 Mer Ribhoi District haka jinglut kumba T. 13 klur.
“Ka seng naduh ki por ba mynshwa kala dep buh daki dorkhas ban tei noh daka Quarantine Health Check Gate haki thain khappud ka Meghalaya-Assam ban eksamin iaki mrad hashuwa ban pynpoi sha Meghalaya” pyntip u Bah Daminot.
U Bah Daminot ula kam ba kane ka jingdawa kadei ban pynthikna ba ki mrad ba pynpoi sha Meghalaya ban bam doh ki paidbah, ki long kiba koit ba khiah.
“Ngi dap daka jingkmen baka Sorkar kala dep ban thied iaka jaka bad kala ioh jingmynjur iaka song pisa ban tei iaka Health Check Gate” ula ong.
Nalor kane u Bah Daminot ula iathuh baka AMPFA kala dawa ruh na u Myntri ka tnat Animal Husbandry, ban pynmih daka Mission naka bynta ban iarap iaki nongri syiar jong ka Jylla.
“Ia kiba ri sniang, ka Sorkar ka pynmih daka ‘Piggery Mission’ iaki ri Masi daka ‘Milk Mission’ bad iaki ba ri dohkha daka ‘Aquaculture Mission’ hynrei haduh mynta ka Sorkar Jylla kam shym la pyntreikam iaka Mission naka bynta ki nongri Syiar” ula ong.
U president ka AMPFA ula iathuh ba tang ha Ri-bhoi district, donkam palat 50,000 tylli khun syiar iaka ki nongri syiar ki hap thied na sha bar ka Jylla.
Ula ong baka Jylla ka don ka jaka pynkha khun syiar lane ka Hatchery jong ka Sorkar Jylla ha Kyrdem Kulai Ri-bhoi district hynrei kane kam dei jong ki syiar pham.
“Nalor baka Jylla kam lah ban pynmih syiar kham bun bad ka hap thied khun syiar na sha bar ka Jylla, ki nongri syiar ki hap ruh ban thied ki dawai, ki jingbam syiar bad teng teng, wat iaki Doctor hap phah wan na sha bar ka Jylla” ula ong.
